Sim u cufoyo du claymo du cameydan dıqtil ba tagliyotho b’Boğdod

A’clayme mtagılyone du wahdo d’Altahrir bı Boğdod mtayablın janaze remzonoyto u mawtbo d’buyoye cali ruho du claymo Suryoyo dıqtılwo 24 bu yarho d’Şbot dşaficina bu buğro dmarıswo cal rişe m’zayno du saydo, bu zabno dıkmıştawtafwo la tagılyotho du protesto dımtaybiwo bu wahdo d’Alxıllani bı Boğdod. Lu mawtbo da buyoye mıştawtafleste u babo wi yemo du claymo Suryoyo dımvayacle a’hayayde Rimon Rayyan Salım.

Kunoşo rabo dı clayme ma came u mathhabe mşahılfe du Iraq, mıştawtaflın li janaze remzonoyto ulu mawtbo d’buyoye dımtayablın aclayme qawmonoye bu wahdo d’Altahrir bı Boğdod, cali ruho du claymo Suryoyo Rimon Rayyan Salım dımvayacwole a’hayayde bu buğro dmarıswo acle m’grube mzayne dıkmısnodi mu İran.

U babo du claymo Suryoyo Rayyan dmıştawtafle la buyoye du wabro, bu mamlo dsımle lu tboco froso mqadamle a’tawdiyothayde la clayme qawmonoye du wahdo d’Altahrir cali awyutho dmahwelın, u mırle “Rimon u w’abrathxu wu ahunathxuyo dnafıl sohdo laşan u Iraq, u kıtli sabro da mtagılyone dmotın lu nişo dkobın ağuno laşane”.

U babo du claymo Suryoyo mawdacleste dhuwe latyo mi mditho d’Boğdod, elo ma galwoye d’Mawsalyo, u mırle “bi mcadronutho da clayme d’Altahrir ubi klaytaththe acmi, trılali dlıroğaşno dkıtno balhudi bı Boğdod”.

Camgabıdathe, i yemo du claymo Rimon bu mamlo dsımla mahwela sabro da mtagılyone dmaydi u zedqo dkul sohdo, u mırla “u cafro du wahdo d’Altahrir maşte bu admo da sohde”. A’clayme d’Altahrir mıştawtafwolınste meqım kımo yawme la buyoye dımtaybiwo cali ruho du claymo Rimon, bi cito d’Sayıdıt Alnajat da Suryoye Qatholiqoye bı Boğdod.

Megabo hreno, i qadişutho du fatıryarxo di cito Kaldoyto d’Bobıl Mor Luwis Rofayel Qadmoyo Sako, sımwole lumıhreno socurutho li iqartho du claymo Rimon. Bi socuruthayde Mor Luwis Sako maqımwole teşmışto cali ruhayde, u mqadamwole buyoye li iqarthayde, ube bzabno i qadişuthayde mqadamle alfo dolare xıd mcadronutho li iqartho.