Suriya hfuxyo cam teqimo tedbire mdabronutho

U rejim d’Suriya dkıtyo i celtho du shofo du athro, mahwele i cajazayde me Amerika dkıtla qedomo frişo la fenyotho dlatne bi moruthayde.

Darımsuq bu buyono dfrısla, krıhla u qedomo d’Waşington dkıbco dmaqimo a fenyotho di Mdabronutho yothoyto u hın fenyotho d’İdlıb ma tedbire momunoye umu qonuno d’Qaysar dmahti calu rejim d’Suriya.

Bu yarho d’Şbot dşaficina, i mdabronutho d’Amerika mawdacwola dkıtla mabco dmaqimo a’fenyotho du garbay madınho udu garbay macırbo d’Suriya, ma tedbire dmahti calu rejim bu taro du qonuno d’Qaysar, elo balhude a’fenyotho dkıtne bi morutho du gbino marıhbono d’Alnusra lıgıdmıcfın ma tedbirani.

Cali sbuthathe, i wazirutho di baroyutho du rejim d’Suriya bu buyono dıfrısla krıhla u qedomo d’Waşington lafela, u mawdacla d’Amerika bi dawsathe kıbco d’obo fuşoqo li siyase dkımmaşyola, bi dacwa dkıbco dımşawşıto i tahrazto du nqolo di mcadronutho noşoyto, udmaxifo u husrono momunoye dıhzelın a’fenyotho du garbay madınho udu garbay macırbo d’Suriya.

U rejim d’Suriya dmawbele u athro laf shofo momunoyo, kımdace ste d’Amerika bi dawsathe kımmaşyo siyase du kahxo calu kenşo emwothoyo ucala timoyotho d’Emwotho Mhaydotho ubi qadmoyuthaththe u iqoro di morutho, di şaryutho udi hdoyutho da n’arcotho d’Suriya.

U rejim d’Suriya khoze dsim dhılmiye acle ba tedbire qaşye dmahtila Amerika bu taro du qonuno d’Qaysar, elo lıkhoze i dhılmiye wa qtolcame barbroye dsımle bhaq da came d’Suriya ba 11 ışne dşaficina.

U rişono d’Amerika dmeqım Donald Trump, bi harayto di şato da 2019 mdewole u qonuno d’Qaysar dmahıtle tedbire momunoye cal farsufe ucal şutose dıksındi u rejim d’Suriya, udıkmıthomi m’Amerika bu dyoşo da zedqe noşoye. U qonuno d’Qaysar mahıt calu rejim bıthır ma casrowat olfawo d’surotho dımbarbıziwole folho du rejim. Ba surothani kmahwın a’teşniqe wa qatle barbroye dsimiwo bhaq da mdinoye du qawmo d’Suriya.

Amerika dothe dcıfyo a’fenyotho du garbay madınho udu garbay macırbo d’Suriya mu qonuno d’Qaysar, inaqlayo i mdabronutho yothoyto kibe dhowela esore di tagorutho cam şutose statuke u athrawotho baroye.