Taşdaryotho me Suriya matın l’Amerika leşan dhudri bu knuşyo da 76 du Mawtbo Gawonoyo d’Emwotho Mhaydotho

Taşdaryotho frişe me Suriya, matın l’Amerika leşan dhudri bu knuşyo da 76 du Mawtbo Gawonoyo d’Emwotho Mhaydotho dgımisım b’New York.

A tloth taşdaryothani’ste, hdo mi Mdabronutho yothoyto, mu rejim d’Darımsuq wi hreto mi saqıbloyutho dıkmısnodo me Turkiya’ne.

Athmıl matın 3 taşdaryotho me Suriya l’Amerika leşan dmıştawtıfi lu knuşyo şatonoyo dgımtayıb u Mawtbo Gawonoyo d’Emwotho Mhaydotho b’New York. Hdo ma taşdaryothani mi Mdabronutho yothoyto du garbyo udu madınho d’Suriya’yo, hreto mu rejim d’Başar al Asad’yo wi tlithoyto’ste, mi saqıbloyutho dıkmısnodo me Turkiya’yo.

A 3 taşdaryothani matın l’Amerika, yawmo meqım mıd a rişone d’britho gıdmabdın a mamlathe bu knuşyano. Bu yawmoyo du knuşyo’ste kito sebwotho frişe; beynothaye u qetro du muzoğo udu kyono uğer. Bebzabno a rişone dbritho, gıdkolın’ste cali tahrazto nukleer du İran bu taro da taşrore dfrısle u Tukoso Emwothoyo du Energi udu Atom.

Bu knuşyano’ste, gıdsoyım u rişqutno hatho du İran mamlo la hadire. İ taşdarto di Mdabronutho yothoyto mrayşıno mi rişonitho zawgoyto di Sictho di rişonutho du Mawtbo d’Suriya Demoqratoyto. İ taşdarto du rejim’ste mrayşıno mu waziro di baroyutho Faysal Mıqdad.

İ taşdarto di saqıbloyutho dıkmısnodo me Turkiya’ste kmirayşıno me Şalal Gaddo. Camgabe dıkmdawım u knuşyano, a taşdaryotho gıdhowelın’ste ytawyotho cam mşale Amerikoye frişe bnişo dmıkle calu maşıqlo folitiqoyo d’Suriya, calu qrobo dıkmdawım b’Darca u İdlıb wi aykanoyutho du garbyo udu madınho d’Suriya.