Tebe b’qfisutho: 2 citotho du camaydan itawto Chicago, Samir Geagea droşo şekolo şultonutho, u xer

2 CİTOTHO CAMAYDAN ITAWTO CHİCAGO – Bıthır mu knuşyo rbicoyo dı kamıl bayn la tarte citawotho du cameydan i cito d’Madınho d’Othuroye, wi cito d’Madınho frıslın buyono bu leşono suryoyo dıg mahkın dkıtne qariwe ba rınye lıhdode, mawxa gıdhowelın u ytowo hrene ramhıl naa hreto laşan dmihaydi tahte qtoro dıhdo cito.

BNOYO 2 MADRAŞYOTHO HATHE BAĞDEDE – U qaymaqam di qastra Suryoyto Bağdede Cisam Behnam Matte sımle socurutho lu bınyono da madraşyotho dkıtyo bu qentrun d’Bağdede. U qaymaqam azeyo mcaqable u bınyono u  mıdle mawdconutho calu maşıqlo du bnoyo da madraşyotho di qastra.

SAMİR GEAGEA DROŞO ŞEKOLO ŞULTONUTHO – Bithir ma ğuboye du athro d’Lebnon dkamiliwo bi zoxutho du gabo da haylawotho d’Lebnon dkityo bi rişonutho d’Samir Geagea, hule maqırhonutho lu tboco froso dmahkele cala şartat du şekolo di şıltonutho dı fayiti lu gabeyde. Geagea kaliste cali aykanoyjo du zayno u mırle larwal mu gayso d’Lebnnon lı kowe more d’Zayne hrene dsaymi rmoşo bu athro lruhaye.

SDF U CAŞIRYOTHO YTAWTO BETH ZALIN – A caşıryotho caraboye cama haylawotho d’Suriya demoqratoyto QASAD wa mathlone du gabo du huyodo Suryoyo matımlın i taklitho dımhadrowelın mqabıl da hcome dıksaymo turkiya cala arcotho di mdabronutho yothopyto du garbyo u madınho d’Suriya.

İLHAM AHMAD TURGOMO BU QLİMO KURDİSTAN – İ rişonitho di sicto mşablonitho du mawtbo d’Suriya demoqratoyto İlham Ahma dhula maqırhonutho lu tboco froso, bhaq da droşe dkowelın cama saqıbloye d’Suriya. Ahma mırla i hiyoyutho ddu athro d’Suriya lık mathlo a came dıkhoyın b’Suriya kule mawxa klosım mişahlıf u nomuso du athro.

TURKİYA HÇOME MAXMUR U SULEYMANİYE – İ şıltonutho d’Turkiya kımdawmo ba hcome dıksaymo cala arcotho du İraq b’dukotho mşahılfe. Bha hcomo dsımla b’tayosto dlo pilot qtila 5 farsufe dkıtwene b’Radayto azole bu darbo.

İQARTHO AHMAD REZA JALALİ-QROYTO URİFİ – İ barthzawgo du akademikoyo Ahmad Riza Jalali dkıtle barmothoyutho du athro du Swed dkıtyo msikio bu İran bu thomo di goşuşutho tlıbla mu Huyodo d’Urifi dmitarfe u dlo mişniq bu athro du İran.

PAŞİNYAN YTAWTO ALİYEV B’BRUKSEL – Adyawma a rişwazire du athro d’Armenya Nikol Paşinyan  wu rişathro d’Azerbaycan İlham Aliyev laqın hdode camu rişmawtbo du huyodo d’Urifi Şarlıs Mişel, laşan dırşi a qatre dkito bayn la tre athrawotho bi sbutho d’nagurno Qarabağ.