Teştecenye cjiqe mi şultonutho Turkeyto cal qoyumo Çelik

Qoyumo Tuma Çelik ba fulhone dkobe hani eşne, ba rmoyotho dımqadamle uba mamlayde bu parlamento, qulnaqla sımle sturyo i siyase di şultonutho d’Turkiya dıkmaşyo calu camaydan u cala hiyoywotho etnikoye hrene.

 Bi netije da thome cjiqe dsimi bhaq dide Çelik, mıstacfele m’HDP leşan du gabayde dlo hoze husrono mu maşıqlo du komplo siyasi dsim mqabıl dide.

Tuma Çelik dımnaqe bu siqumo d’24 Hziron 2018 qoyumo d’Mırde mu gabo Demoqratoyo da Came-HDP b’tahrazto dilonoyto mid nişo. A fulhone dımaşele qoyumo Tuma Çelik u dilonoyo leşan du Sayfo dan 1915 dathi calu camaydan, wu mamlo haroyo dsımle calu Sayfo bu parlamento, kmahwe dımzawarre i zıhniye anti demokrat u mankıronitho di şultonutho Turkoyto.

Camgabıdathe Çelik bu fulhonayde di qoyumutho mqadamle rmoyotho, bu kursyo du parlamento d’Turkiya mamtele lu yawmoyo u mıjğele a şwole huquqi, noşoye u makthabzabnoye du camaydan u Suryoyo, uda hiyoywotho etnikoye hrene. Calathe a mqımdine, a şutose du tbocofroso wa farsufe du tbocofroso kenşoyo dkıtne masre bi şultonutho mşarelın bı propaganda dkıtyo cal asas d’thome cjiqe u banye cala dugle mqabıl dide.

Bu komplano, bi fezleke (bi warqo du thomo)  dımqadmo cal asas da thome lu şarire dıhdo athto, ba dugle du tbocofroso dkıtyo masro bi şultonutho a thome lo şarirani maqşın. İ fezleke bşıkıl lo kyonoyo u bsırhobo dathyo lu yawmoyo du komisyon dıkmadla li ido, kmahwe dhawyo bu amro di şultonutho dhula lu huquq.

Bu lekohano dıkmitaşe mqabıl du qoyumo du camaydan, kmahwe kito tahrazto dıhjomo mqabıl du camaydan, di saqıbloyutho demoqrat d’Turkiya udu xtuto sagiyonoyo d’HDP.

İ zıhniye du qtolğenso d’AKP-MHP d’Turkiya dıkmisomo sturyo Emwothoyo u dıkmıkroho ma camle lo qonunoye dıksaymo, leşan dmaqimo a manıciyat dkito qamuthe di siyasayda dkıtyo bnitho calu cnufyo u cal ha şıkıl, kull yawmo kmısko la hbuşye ba casrowat bnaynoşo mcal fothe du renyo folitiqoyo dkıtte, umi hiyoyutho etnikoytathe u kmafitolın ma teşniqe.