Tılib me Pompeo dsoyım hboso cal Turkiya

A qoyume du mawtbo mathlonoyo d’Amerika tlıblın mu waziro di baroyutho d’Amerika Mike Pompeo dsoyım hboso cal Turkiya dmarfiyo a hbişoye siyasiste cam gabe dımarfele hın ma hbişoye hrene.  A qoyume bi egartho dımşadrolın lu wazire kımmi. Bu zabnano du kewo di corona dıkmibarbız xayifo klozım ahbişoye folitiqoyeste dmitarfın mu qento dkito cala hayathe dıtofelın u kewo.

6 qoyume mu gabo demoqratoyo dkıtne bu mawtbo mathloyno d’Amerika kıthulın egartho l’pompeo dsoyım hboso casyo cali şıltonutho d’Turkiya dmarfiyo  a hbişoye folitiqoye dkıtne ba hbuşye d’Turkiya dı zıttır mu lazım kito hbişoye ba hbuşye.

A qoyume kımmi a hbuşye d’Turkiya dkibın zıttır mu mınyono kyonoyo hbişoye dıthe tofe u kewo di corona lıha farsufo bu hbuşyo bzabno karyo gıdtofe la hbişoye kule u hano qento raboyo cala hbişoye dilonoyith dkıtne folitiqoye.

A 6 qoyume demoqratoye tlıblın mu wazire  Pompeo dhiye foyıt la esore cam Turkiya domarlın i bocuthathe da qoyume dkıtyo i bocutho d’Amerika mqabıl d’Turkiya.

Bi egarthathe a qoyume gurşi u zuhoro du athro d’Turkiya kothe bu sedro da 9 athrawotho dkibın bısagiyutho u kewo di corona, mawxa kito ğamo rabo cala folitiqore dkıtne hbişoye.

A qoyume kımmi Turkiya mıdwola fusqono dı marfiyo hın ma hbişoye elo belhude marfela a hbişoye dkıtweyne ganowe, dsımlın hawbe, u jarimat noşoye, bram i bocutho da qoyume dmitarfın a folitiqore a gelyunore wa nahire.

Me gabo hreno lfuth hın mabuce du tboco froso Amerika mawfaqla Turkiya bnaqqa hıdo mi tarmitho da tayısyotho F35 dhın ma falqe gıdmisomiwo b’Turkiya u bu şıklano gıdhuyowa şorıkto bi tarmitho.

İ sbuthathe  qadihowa inaqa d’Turkiya mnasela dzawno a zayne dkıtne S400 me Rusya.  Amerika maklewola Turkiya mi tarmithathe, bram ba tebe ducdo frisi kmitawmır d’Amerika hula u sahmo d’turkiya dkıtwola bi tarmithathe du syomo da tayısyotho d’F35 lıhdo şırke Amerikoyto, u hawxa Turkiya law fayışla mede bi tarmithathe da tayısyotho.