25/02/2025

Trump kimdace d’Putin dımaqbıl u terkiwo d’hayle Urifoye dgınutri u şlomo b’Ukraina

Bu zabno du mamlo mşawtıfo dsımle u rişono d’Amerika Donald Trump camu bar’amnayde d’Fransa Emanuel Macron b’Woşington mawdacle, du rişono Rusoyo Vlademir Putin, gıdmaqbıl u terkiwo d’hayle Urifoye dgınutri u şlomo b’Ukraina. Bebzabno Trump mawdacle’ste, da droşayde cam Putin jıddi’ne udu rişono Rusoyo’ste kobıc dmıhthım u qrobano b’Ukraina.

25/02/2025

AMRIKA MHAYDE – U rişqutno d’Fransa Emmanuel Macron dkıtyo ucdo b’socurutho b’Amerika, hawile droşe camu rişono Donald Trump ubi ytawto dsimo bıthır lu tbocofroso, Trump mırle; Drişli camu rişono Rusoyo u şwolo di ithutho d’hayle Urifoye b’Ukraina, bnişo dmisım u duyoqo du şlomo. Putin gıdmaqbıl u medano bi harayto, cal dhuwe’ste lo kobıc qrobo dbritho. 

Putin meqım baroyo rofadwo dmişadır folhe Urifoye l’Ukraina elo ucdo lfuth Trump, Putin latle şwolo bi sbuthathe. Elo u rişono Amerikoyo komır’ste, dkito gado rabo dlıgmitadcıri an arcotho dmidila Rusya l’Ukraina. Camathe Amerika, kınutro d’Ukraina dmıdyo cal qariwo u qyomo da macdane. Bıthır mi ytawto dcam Trump, Macron mawdacle lu tbocofroso d’Amerika, dkito ihtimal rabo d’mımte l’şalyuthzayno beyn Ukraina u Rusya mucdo lkmo şabe.

Bu zabno di şalyuthzaynathe’ste gıdmdawmi a droşe leşan u terkiwo d’şlomo aminoyo. Wi sbuthathe’ste drişole Macron cam ğer rişone Urifoye dmawdace dkıtne hadire dmibayın garanti di mşaynutho. Bebzabno athmıl dkıtwe u yawmo şatonoyo da 3 eşne dıkmdawım u qrobo b’Ukraina, u Mawtbo di Mşaynutho d’Emwotho Mhaydotho m’ayade 10 athrawotho i rmoyto dımqadmo me Amerika u acma’ste Rusya.

Elo Fransa u Britania lo huwlın u qolathe. Bi maqırhonutho di rmoytathe kmıtlıb dcal xayifo dmitakle u qrobo u dhowe şlomo aminoyo beyn Ukraina u Rusya. İ rmoytathe’ste simo sturyo cal dlo kle cali morutho dan arcotho d’Ukraina u dlıkmibahıs eba, d’Rusya’yo dmabdewola a hçome cal Ukraina.