Trump ksonıd u Yawnan mqabıl du kriz da galwoye

Amerika ksındo u athro du Yawnan bu nfoqo mqabıl du kriz da galwoye dıxlıqla Turkiya ba yawme haroyani.

Camgabıdathe, i şultonutho d’Athina mawdacla dımnıcla zıd m’24 alfo farsufe dşıfci manarcotho dı Turkiya lu athro du Yawnan.

U rişono d’Amerika Donald Trump mawdacle du athrayde ksonıd u Yawnan bi sbutho du sutoro da thumayde ma galwoye dıkfixi acle mu athro dı Turkiya.

U makıthbo di rişqutnutho du Yawnan bu buyono dıfrısle mırle “u rişono d’Amerika Trump hawile esore bu darbo du talafon camu baramnayde du Yawnan Kiryakos Mitsotakis. Ubu mamlo dsımle Trump mawdacle du Yawnan kıtle zedqo kamilo dlaybe dmıdrış acle bi sbutho du sutoro da thumayde”.

Be bzabno, u buyono mawdacle di şultonutho d’Athina gıdmafito la haye şişaltho dı tedbire dımbaynile u mawtbo di mşaynutho umthoyto du Yawnan, baynothaye u teqwiyo da haylawotho da noture da sforyame wu teqşiyo du duyoqo du yamo.

İ şultonutho d’Athina mawdacla da haylawotho noture da sforyame m’yawme d’şabtho dşaficina uhul ucdo mnıclın zıd m’24 farsufe dşıfci b’şıkıl lo qonunoyo manarcotho dı Turkiya lu athro du Yawnan. Be bzabno, a’puwelıs Yawnoye msıklın ba casrowat d’galwoye i sagiyuthaththe m’Afağanistan, mı Pakistan ume Mağrıb ne.

Camgabıdathe, abotaydino di golutho du Yawnan hkımlın hbuşyo d’arbac ışne u msomrişo d’10 euro mqabıl d’183 farsufe dıthimi dımnaselın dşıfci athume du Yawnan b’şıkıl lo qonunoyo.

U ajans Amerikoyo da tebe d’NPR mawdacle dhın gozaryotho du Yawnan mşarelın bu bnoyo d’maşıryotho rabe u sxire dıkdomın l’hbuşye da galwoye.