Trump mbayanle 50 milyune la tarmiyotho laşan i hirutho da tawdiyotho bı britho

U rişono d’Amerika Donald Trump, huwle amro dmıfrış 50 milyone dolare la tarmıyotho leşan i hirutho Emwothoyto da tawdiyotho bı britho kula.

 Bu taro du amrano dhuwle Trump, u waziro di baroyutho Mike Pompeo gdımbayın tahrazyotho da fulhone lan athrawotho, bnişo dmitaqimi a rdufye tawdithoye.

 Lfuth u tebo dfrısle u froshezwo Mşihoyo CBN News, u rişono Amerikoyo Donald Trump, huwle amro dmıfrış 50 milyone dolare la tarmıyotho leşan i hirutho Emwothoyto da tawdiyotho bı britho kula. A zuzaniste gıdmitahwın li wazirutho di baroyutho ulu Tukoso Amerikoyo du Quyomo Emwothoyo-USAİD.

Bu şıkılano, gdımbayın u waziro di baroyutho d’Amerika Mike Pompeo tahrazyotho da fulhone l’athrawotho frişe, bnişo dmitaqimi a rdufye tawdithoye. Bu amrano dhiw mawdıc; İ hirutho tawdithoyto dkıtyo i hirutho qamayto dhawyo b’Amerika, şart di mşaynutho udu moral’yo. Hirutho tawdithoyto leşan a came kulle bı britho, kıtla qamoyutho bi siyase di baroyutho d’Amerika. U Amerika kımyaqro u kımşajco i hirutho tawdithoyto.

U amrano hiw, bu zabno dkito ğalabe rdufye mqabıl da tawdiyotho, dilonoyith mqabıl da mşihoye bı britho. A rdufyaniste kull dkothe kızaydi u kıqoşın. U mcadrono du rişono Mike Pence wu mdabrono d’USAİD John Barsa mhanelın u fusqonano u mqadamlın a tawdiyothathe lu rişono Amerikoyo dıkmşajıc i hirutho tawdithoyto bı britho.

Barsa mırle; Amerika kull naqla snıdla i hirutho tawdithoyto, howe u funoyo dhuwla lu qtolğenso dsim cala Mşihoye ucala Ezidoye bu garbyo du Iraq, uholu qşoco etnikoyo da Maşılmone d’Burma. I mardutho du snodo di hirutho tawdithoyto, kuthyo bi qamoyutho da fulhone d’USAİD.

U fusqonano d’Trump mid, bıthır mıd u Komisyon Amerikoyo di Hirutho Emwothoyto da Tawdiyotho frısle u taşrorayde di şato bu yarho d’Nison dı şafıcina. Bu taşroranoste grışwo u zuhoro cali hirutho tawdithoyto b’14 athrawotho frişe; beynothaye u Iraq, Suriya, Turkiya uğer.