Trump mşayacle egartho l’Al Asad calu qefoyo du gelyunoro Amerikoyo

U rişono d’Amerika Donald Trump, mşadarle egartho dilonoyto lu rişathro d’Suriya Başar Al Asad, bi sbutho d’gelyunoro Amerikoyo.

 Bi mawdconutho dhuwle u waziro di baroyutho d’Amerika Mike Pompeo makadle, bi egarthathe d’Trump ktolıb mu rejim d’Suriya dımşayıl calu gelyunorano dımvayacwo b’Suriya heş mi şato da 2012.

Lfuth i mawdconutho dhuwle u waziro di baroyutho d’Amerika Mike Pompeo, u rişono Donald Trump tlıble mi şultonutho du rejim d’Suriya dımcadro Amerika leşan dmiqafe u gelyunoro Austin Tice, dımvayacwo b’Suriya ba 2012.

Pompeo mırle; İ şultonutho d’Washington ğalabe naqlat mnasela dmacbıro a mşale d’Suriya li dawra, bnişo dmiqafe u gelyunoro Amerikoyo dkıtyo hani 8 eşne mvayco b’Suriya. U rişono Trump, mşadarwole egartho lu rişathro Başar Al Asad heş bu yarho d’Odor u tlıbwole dhowelın dialog baroyo camhıdode.

U waziro Amerikoyo makadle, d’Trump frısle ucdo egartho dımakadle eba u talab dhawile mu rejim, leşan dmiqafe u gelyunoro Austin Tice. Trump mırwole; tlıbli mi şultonutho d’Suriya dfulho acmayna, leşan dmitadcır u gelyunoro şaryo l’Amerika, dflıhle l’dafe frişe; beynothaye AFP, CBS, Washington Post uğer.

U gelyunoro Austin dkıtwe 31 eşne, msıkwo 14 bu yarho d’Ob da 2012 bı nuqazto du duyoqo qariwo lu bethtawso d’Darımsuq. Meqım şato, mıtyaqnowa Washington du gelyunoro heş ba hayewe u ba 2018, mbayanwola Amerika milyon dolar lu ha dkıtle mawdconutho leşan dmiqafe u gelyunoro.