Turkiya grışla ruha mu qyomo d’Stanbul dkıtyo mqabıl du cnufyo cala neşe

Bu zabno haroyo i siyase d’Turkiya i barayto wi gawayto krıtho wu rişqutno Recep Tayyıb Erdoğan wu gabo tuhmonoyo di MHP, ksaymi şuhlofe u kımhalqi dawsat leşan dımkasın i casqutho dkito bu athro.

Bi sbuthathe athmıl u rişqutno mdele qonuno d’maklele u qyomo dcam Urifi dıkmastarwo a zedqe da Neşe u bebzabno mıdle u rişono du bank qentrunoyo du athro mi wolithayde.

Bıthır mi ytawto dhawiwole u rişqutno Turkoyo cam mşale d’Urifi, dme zabno yarixo dkıtne a esore m’watye beynothaye udi siyase gawoyto dkıtyo mharhazto bu myodo da fusqone du msoko da farsufe, u droşo du sxoro du gabo di HDP udu rişqutno mdele u qonuno dgurşo Turkiya ruha mu qyomo d’Stanbul dıkımdafıc cala zedqe da neşe.

U qyomano mıdwo fusqono acle ba 2014 dıkhobış bgawe, dıklozım Turkiya saymo fulhone dıkmaklıyo u cnufyo wu qatlo, u dmitazidi a zedqe da neşe u dhowe şawyutho da ğenze bu taro du Huyodo d’Urifi. Bıthır mu fusqonano u mcadrono du rişono du gabo Qutnuthoyo da Came Gökce Gökcen mahwele hfuxyo u mırle; İ mıcne du nfoqo mu qyomano, a neşe gıdothın bu darğo da 2 u bebzabno tro mıqtoli-awkith u sutoro dkıtwo me Urifi lu sutoro da zedqe da neşe kqoyım.

Camgabedathe ğalabe mathlone d’şutose u tukose da neşe mahwlın hfuxyo u kımmi, u fusqono du qyomano mıdwo bu darbo du parlamento mawxa u mede dsim ucdo fawdo mqabıl du nomuso esonoyo du athro’yo. I mşalonitho di hiğmonutho du gabo d’CHP Canan Kaftancioğlu hula maqırhonutho u sımla sturyo du hıkım dha gabro dıkhokım Turkiya u mırla; Ahna i methtaksonutho da neşe gıdqumro u gıdmaydina a zedqeydan bi harayto.

Me gabo hreneo i aykanoyutho harıwto du momuno d’Turkiya mfarqıco brişe du rişono du bank qentrunoyo dmid mi wolitheyde. U fusqono’ste mu rişqutno mid.

Bgawe d’20 yarhe, hani 4 rişone du bank qentrunoyo kmişahılfi elo naqla hreto u momuno du athro lıkmicadıl.