Turkiya u Dacış maqşelın ahjomathe cal dukotho d’Suriya

Me gabo hreno, bu zabno da ğrobe marhıbone d’Dacış maqşelın ahjomathe cali mditho d’Raqqa, a hayle kaboşe d’Turkiya wa marhıbonathe kımdawmi a cuqobathe cal Cayn Cisa.

 Bebzabno i Mşatasto da zedqe noşoye d’Suriya mawdacla, da marhıbone d’Dacış qtilın hamşo folhe du rejim u tlotho ma hayle dıksundile, bu hjomo dsim cali nuqaztathe b’Deyr Ezzor.

Ba zabne haroyani, mnasela Rusya wu rejim d’Suriya dsaymi hboso cala Haylawotho d’Suriya Demoqratoyto leşan dmıgroşi me Cayn Cisa. Camathe’ste a hayle Turkoye wa marhıbonayda ba hçome dıksaymi cali fnithathe, huwlın mkono la marhıbone d’Dacış dmaqşın a hçomathe cala xute rişoye d’QASAD.

Ba 10 yawme haroyani, sımlın a marhıbone 7 hçome qaşye b’Raqqa u mıstacmelın foqucotho u zayne yaqure aclaye wa hayle muttafik d’Turkiya’ste bı qaşyutho kımdawmi a hçomathe cal Cayn Cisa ba 2 yarhe haroyani. Hathe kımadilo, d’Dacış maqşele a hçomayde cala dukotho dıkhoze dkito xalyutho di mşaynutho

Bi şato da 2020, sımwole Dacış 389 hçome bu qlimo d’Deyr Ezzor u b’Raqqa sımwo 59 hçome. Me gabo hreno lfuth i Mşatasto da zedqe noşoye d’Suriya, a marhıbone, qtilın 8 ma folhe du rejim bu madhıbro d’Deyr Ezzor u 11 hrene mçarhi bu hçomo dsim aclaye athmıl. Beyn da qtiloye kito 5 folhe du rejim u 3 ma sanodayde.

Mu şuroyo di şatathe uholucdo, a krılyotho d’Dacış qtilın 44 folhe du rejim ba hçome dsımle aclaye. Camani’ste kito 15 folhe dkıtne heş mvayce bıthır mu hçomo dsımle Dacış aclaye yawme d’Cruto bi mdito d’Hama. U baso da folhani mqafe mawqıdo u kito ihtimal da folhani qtili yaste msiki yasire. Bu yarho d’şafıc’ste qtılwo 39 folhe du rejim b’Deyr Ezzor bu hçomo dsımwole Dacış aclaye.