U camaydan d’Ankawa mşadarlın egartho lu Papa Mor Fransis Qadmoyo

Anabne du camaydan dıkhoyın b’Ankawa du Iraq, mşadarlın egartho li qadişutho du fatıryarxo di cito Qatholiqoyto Mor Fransis qadmoyo.

Bi egarthathe u camaydan tlıble mu Papa, dmaxlıs i nuqazto harayto da Qatholiqoye mi şultonutho du qlimo d’Kurdistan.

Bu şuroyo di egarthathe, mahke cal Ankawa dıkhoye eba adyawma hol 30 alfo man abne du camaydan u Kaldoyo Suryoyo Othuroyo u hıdo ma nuqazyotho haroye di cito Qatholiqoyto bu Iraq. Bi egartho griş u zuhoro cali socurutho dsımwole i qadişuthayde du Papa l’Ankawa u aydarbo mıstaqbalwo b’fsihutho mu camaydan.

Bi egartho mahke mıqa i qadişuthayde mhanewole i şultonutho d’Arbil bu hefodo da zedqe da Mşihoye du qlimo. Elo camhbol u mamlo dsımwole u Papa latwe cali şrorutho du qlimo, cal da fulhone udi siyase dıkmaşe KDP-tewfiqo du camaydan ma dukothayde a şerşoyeyo, u kmiqadım b’lo kinutho u kmidış u camo b’Ankawa.

Bi egarthathe u camo kıgorış u zuhoro du Papa cali siyase di madatho dmahto belhude calu camaydan b’Ankawa ulo cala came hrene dlatne Mşihoye. Mawdıc di şultonutho kımaydo hol 4 milyone dolare i şato ma Mşihoye wu snodo dhiw ba 2019 leşan u bınyono tahtoyo-mahıt cala qıryawotho kulle dlaybın Mşihoye u ma qıryawothaniste lıkmimıd madathe ma comure.

Camatheste griş u zuhoro calu kboşo ucalu gnowo dan arcotho du camaydan b’Ankawa mathlo du medano’ste mbahıs calan arcotho dıbne u bethtawso Emwothoyo d’Arbil uğer tarmıyotho dsimi calan arcotho dkıtne du camaydan u naqla hreto lıkmitahwelın ulo waraqa. Camathe kula’ste camaydan, lıkmimıd lu şuğlo ba dukothani dıbnın calan arcothayde.

Athrawotho frişe u acmaye’ste Emwotho Mhaydotho kıtte plane du bnoyo d’makthbe calan arcothani dgniwi ma Mşihoye. Calathe u camaydan tlıble mi qadişutho du Papa dhowe mcadrono wu qolo du camaydan u dmıjğıl i şrorutho mqabıl da hawbani dsimi acle bu athro dan abohothayde. Tlib’ste mu Papa dlo maqbıl i frişuthathe dıkmisomo calu camo şerşoyo du Iraq dıkmgalwe ma dukothayde a makthabzabnoye.