U camaydan u Suryoyo Moronoyo di Lebnon mcayadle u cedo d’mor Marun

LEBNON – Bi cohnutho du cedo du şfico di cito Suryoyto Marunoyto qadişo Mor Maron, u fatıryarxo Mor Bşara Bıtrıs Alraci mrayşanle u qurobo alohoyo d’yawme d’Huşabo bi cito d’Mor Jırjıs bi mditho d’Bayrut, bi mıştawtfonutho du rişqutno d’Lebnon rabhaylawotho Josef Caun wi bethzawgayde Nicmat Caun, u rişono du parlamento Nabih Bırri, u rişwazire Nawwaf Salam wi bethzawgayde Sa(h)ar Bıcasiri, cam menyono celoyo d’rişone folitiqoye u citonoye u mşale deblomasi u folhoye u kunoşo rabo dımhaymne. 

Fatıryarxo Alraci bi koruzutho dsımle mawdacle du mğabyonutho du rişqutno d’Lebnon madcarle lu cedo d’Mor Maron i zahyuthayde, bıthır m’xalyutho dımdawamwola zıd m’tarte ışne, u mırle “i mgabyonutho du rişqutno madcarla u tuxlono la lebawotho da Lebnonoye, uli iqartho da n’athrawotho Caraboye u Macırboye. U tuxlonano zayıd camu şekolo di şultonutho hathto d’Lebnon dkıtyo şultonutho du turoso udu furqono. Kımhanena u rişqutno Caun wu rişwazire hatho uktılbinalın kuşore bi wolitho rabtho dıknıflo aclaye”. 

Camgabıdathe, Mor Bşara Alraci mawdacle du qento rabo dıkloqele Lebnon u şyorayde yo lafu gbino di mşawhıronutho, mawxa klozım Lebnon dımqadım bıhdo masafe la n’athrawotho qlimoye, uklozım ste dıtofık ruhe lafu gbino di mdinoyutho udu quyomo udu şuşoto, uba melani mdawamle “i noytraliye ulsoytoyo laşan dmınfıq moro li hdoyutho d’Lebnon, cal d’Lebnon xıd athro fayoşoyo, elo kıbcina dfoyış athro laşanayna kulayna. Ahna kmawdena b’Lebnon xıd wahdo du şlomo, statu du lqoyo, u nuqazto dkımgaşmo a’timoyotho da tawdiyotho”.