U camo d’Sweda simle taglitho mqabil di siyase dkımaşyola i şultonutho hathto dı Darımsuq

SWEDA – Athmıl safrayto, ba casrowat d’farsufe mıştawtaflın l’taglitho dımtaybo bu wahdo dı neshono d’Alkarama bu mesco di mditho d’Sweda bu taymno d’Suriya. I taglithathe athyo luhwoyo xıd funoyo la qroytotho dsimi ba dafe kenşoye du nawlo, xıd protesto mqabıl di siyase dkımaşyola i şultonutho zabnoyto dı Darımsuq lafi hiğmonutho d’Sweda. 

Bi taglithathe, a’mıştawtfone mazcaqlın slogane dkım’aydi u rişono ruhonoyo di tawditho da Druz şex (H)ikmat Alhıjri, ubebzabno tcınlın ste surotho du şex Mwaffaq Tarif dkıtyo u rişono ruhonoyo da Druz bu athro d’İsroyel. 

U qentrun du tboco froso d’Sweda, mawdacle di sagiyutho da mıştawtfone bi taglithathe ma hadome du mawtbo folhoyo dımşatıs hatho bi mditho d’Sweda ne, cam hadome d’grube hrene mzayne dkıtne saqıbloye li şultonutho hathto dı Darımsuq. 

M’gabo hreno, a’haylawotho di mşaynutho wi wazirutho du sutoro d’Suriya mahıtlın ido b’şıkıl kulonoyo cali mditho d’Alsanamen bi hiğmonutho dı Darca, u mawdaclın dımkamelın athmıl safrayto a’cuqobaththe b’gawıd di mdithathe dıknıflo bu taymno d’Suriya. 

Ba cuqobani dımdawamlın 24 şoce, hawi taxtuşe qaşye bayn da haylawotho dı Darımsuq wu grub zaynoyo dkımrayşanle u hadomo catiqo ba haylawotho di mşaynutho du rejim d’Alasad Mu(h)sen Alhaymad. Ba taxtuşani dhawın, qtil menyono mu grub zaynoyo u msikıste ba casrowat hrene, elo Alhaymad cam menyono ma folhayde qadiri dmahızmi l’duktho dlatyo idıcto.