U froshezwo d’Suroyo mcayadle u yawmo şatonoyo di mşatsonutheyde bıhdo gala dsimole bu athro du Swed

U froshezwo d’Suroyo mcayadle u yawmo du yubolo şatonoyo di mşatsonutheyde bıhdo gala dıfriso hayo mi şoctho da şwac u falge hul la 11.

Bi galathe cam gabe da mamle dsimi cali yasifutho du froshızwo maşmıc zmaryotho mfarıq myaqronwotho u be bzabno mbayni qamero da doşne da lotariyat.

U yawmano di Gala mşarele bu mamlo dsımlın a mqadmone di Gala u hawreydan Matin Rhawi u Şamiram Rocyo mırlın bşayno la zmine u bıthır hulın u darbo lu zamoro Nawfal Şamcun dmaşmacle zmaryotho mşahılfe la hadire.

Bi galathe dıfriso hayo mqadım mamle mşahılfe u baynothaye u mdabrono d’Suroyo tv Yahkub Mirza mahkele cala şuşote dsımle u froshızwo.

U mawtbo umthoyo d’bethnahrin mşadarwole egartho dımhanewole u yawmo şatonoyo du Froshızwo u be bzabno tlıble kuşore ba fulhone du tboco froso dıkmisomi laşan u teşmico du qolo du cameydan. Bi tahrazto du lalyo kıtwo u zamoro du qolo basimo Tomas Demir dmaşmacwole zmaryotho mşahılfe la hadire u be bzabno marqadwole a hadire.

Ba maqıblonwotho dsimi cama hadire mahkelın cala fulhone yasife dıksoyım u froshızwo d’Suroyo tv u be bzabno athi egrotho ma şutose du cameydan dımhanelın u yawmo şatonoyo  da 17 ışne di mşatsonutho du froshızwo.

Bıthır ma zmaryotho u ma maqıblonwotho athiwo u dawro la myaqronwotho dhiwi la farsufe dımqadamlın fulhone bhaqle mşahılfe lu yuthrono du cameydanu d’Suroyotv. Bıthır mathe athiwo u zabno du groşo du loteri laşan dmibayni a qamore di şathathe.

Bu huthomo du hago di Gala qtico i kuktho dımtaybowa dkıtwo açla u logo d’Suroyotv.

Bu dumyano u froshızwo d’Suroyo tv mafıtle şato hreto mlithooşuşote u froso d’Tebe calu cameydan U suryoyo Othuroyo Oromoyo Kaldoyo.