U fusqono du bethdino d’Turkiya dhule cal Dayroyo Aho Belicen kımdawım dıfoyış bu yawmoyo du cameydan

U fusqono du bethdino d’Turkiya dhule bhaq du dayroyo Aho Belicen kımdawım dıfoyış bu yawmoyo du cameydan u dhın ma şutose u gabe du cameydan.

Bi tahrazto di orucutho dıfriso b’Suroyo tv athmıl bi mdabronutho du hawreydan Danho bar Murad drişo i sbutho du dayroyo Aho Bilecen  wi sbutho du qoyumo du cameydan Tuma Çelik du bethdino maqımle a thome dkıtwo acle.

Bi tahraztathe dmıştawtafle Yahkub Nuhomo mi Sictho mdabronitho du Mawtbo Umthoyo d’Bethnahrin wu rişono du Huyodo Suryoyo b’Almanya Saliba Jusef wu rişono du Huyodo du Quyomo da Qıryawmotho d’Turabdin Robel Gergin, mahkelın cala teştcınye wa hcome dıkmisomi calu cameydan bu darbo du dayroyo udu qoyumo Tuma Çelik, du nişathe dmitaxle u cameydan dfayış bu athreyde.

Elo ba droşe dhawın, a dayfe di tahrazto mahwelın du cameydan kıtle u haylo dmawfıq a teştcınye wa hçome dıkmisomi calu cameydan me hayle mşahılfe u calu darbo dhın hayle bıgawe du cameydan, lu xalyo. Bi sbutho du qoyumo du cameydan Tuma Çelik mırlın; Hathe hdo ma zoxwotho dhawile u cameydan mqabıl da hçome uda thome lo şroro dhawın’wo mi şultonutho d’Turkiya u mu tbocofroseyda u dhın mu tbocofroso du cameydan.

Mathlo lu medano Yahkub Nuhomo mahkele calu waziro di gawoyutho d’Turkiya Suleyman Soylu  aydarbo yatıw cami athto d’thımwola u qoyumo Tuma Çelik, u ğer mathle xıdani. Be bzabno bi tahraztathe mahkelın a mşale da d’HSA u DETA cali kampanya da imdat dımabdelın cama şutose du cameydan leşan dmahwın hfuxyo mqabıl d’Turkiya u sımlın qrayto lkull noşo dcobır u dobe i imdayde xıd snodo lu dayroyo Aho Bilecen. Bi sbutho di kampanyathe hol dıksayminawo a tebe, matiwo u mınyono da imdathe l’zıttır me 3 alfo farsufe.