29/05/2020

U gabo d’AKP kımdawım dımhaqır a Mşihoye du athro

29/05/2020

A mşale Turkoye du gabo d’AKP kımdawmi dımhaqri i Mşihoyutho u dmaqşın i kampanyathe mqabıl da Mşihoye du athro.

 Bi hfitutho du Ramadan dsimo b’Viyana, u rişizgado Turkoyo bu mamlo dsımle mhaqarle a Mşihoye, ube bzabno ha ma qoyume d’AKP bı şubhoro mawdacle, dkıtne masre camu grub dan Ahunone Maşılmone dkıtyo bi lohitho da tukose marhıbone.

 A 2 sefreyawme d’Folx Blat u Krone d’Austuria, mawdaclın dıfris video cali hfitutho dımtaybola i rişizgadutho Turkoyto bu enistitut d’Wender b’Austuria, bu snodo d’şutoso di mcadronutho dkıtyo qariwo l’Bilal Erdoğan dkıtyo u abro du rişqutno d’Turkiya Recep Tayyip Erdoğan.

İ hfituthathe dımtaybo bi cohnutho du cedo du Ramadan, hadırla u rişizgado Turkoyo b’Austuria Özan Seyhun, qoyume mu gabo d’AKP, u menyono ma yolufe Turkoye dkıtne ba botaysawbo du athro. Ube bzabno mıştawtafle’ste li hfituthathe mşale Turkoye mu gabo d’AKP bu darbo du video konferans.

Bi hfituthathe, u rişizgado Turkoyo mfaraqle duşne u mcadrınwotho du muklo u zuze la yolufe Turkoye dkıtne kulle qariwe u noqufe lu gabo d’AKP. Bu mamlo dsımle u rişizgado mırle; A Mşihoye lıksaymi u mede dıksayminale ucdo harke. Bu cedo du mawlodo d’Yeşuc Mşiho, a Mşihoye kmıgroşi l’arbıco şurone u lıkımfarqi a duşne xıd ahna dıksaymina.

Me gabo hreno, u qoyumo Zafer Sarakaya bu mamlo dsımle bi hfituthathe, mwasafle u tukoso marhıbono dan Ahunone Maşılmone wu mşatsonayde Hasan Albanna u mırle; İ xızna timo dkulle dkıtlan an Ahunone Maşılmone’yo. Ahna kıtlan esore di ahonutho acmaye.

Bıthır mi hfituthathe, i wazirutho di kinutho d’Austuria qrela lu rişizgado Turkoyo u drışla acme i maqırhonutho dfriso bu video wi haqara dsımle mqabıl da Mşihoye. İ sfaryawmo d’Folx Blat bu hfuxyo dmahwela cali maqırhonutho du rişizgado Turkoyo, mawdacla di hfitutho xlitho’wa mu adab awkith mu axlaq. Wu mamlo du rişzigado Turkoyo haqara rabtho’yo mqabıl da Mşihoye.

Camgabıdathe, i sfaryawmo d’Korone mırla; İ maqırhonutho du rişizgado Turkoyo haqara la Mşihoye’yo, u kiba dı xılqo kriz beyn da 2 athrawotho.