U gabo Yezidoyo mahwele hfuxyo mqabıl da hçome dsımla Turkiya cali fnitho d’Şigur

U gabo di hirutho udi demoqratoyutho da Yezidoye, mawdacle da hçome haroye cal Şigur athın luhwoyo bu taro du qyomo dımdewo bayn di şultonutho du Iraq wu gabo demoqratoyo d’Kurdistan di KDP.

U gabo Yezidoyo bu hfuxyo dmahwele cala hçome dsımla Turkiya cali fnitho d’Şigur, mawdacle dkio nişo dmıtwır u sebyono hiro da Yezidoye, elo hınne xıd gabo cama comure d’Şigur lıgıdmaşılmi ruhaye la hçomani.

U rişono du gabo di hirutho udi demoqratoyutho Yezidoyo Cumer Saleh, bu hfuxyo dmahwele cala hçome haroye dsımla Turkiya cali fnitho d’Şigur, maglele liholo da hçomani falqo m’tahrazto rabthone dkito mqabıl da Yezidoye u mırle “bu zabno dıksamwo u rişwazire Mustafa Alkadhimi socurutho li fnitho d’Şigur, sımwo u hçomo qamoyo cali şuqo di mditho, ubi netiçe du hçomano tre mharbone nafliwo sohde, baynothaye Hasan Sacid dkıtwe ha ma rişone da haylawotho du mrodo d’Şigur. Ubu zabno dıkmisamwo u zawho du cufoyo da tre sohdani, a’tayisyotho folhoye dı Turkiya sımlın hçomo cali bethkrihe di qritho d’Sakiniya, ubu hçomano ste nafıl sohde u farsufe hrene mçarhi”.

Cumer Saleh makadle da hçomani athın luhwoyo bu taro du qyomo d’09 bu yarho dı Tışrın u Qadmoyo di şato da 2020 dımdewo bu amro dı Turkiya bayn di şultonutho qentrunoyto du Iraq wu gabo demoqratoyo d’Kurdistan di KDP dkımrayşanle Mascud Barzani. Saleh mawdacle ste da tlotho gabe Turkiya, Boğdod wi KDP kımnasın bu darbo da hçomani dmazici a’Yezidoye, dıturi u sebyonaththe udçıbrilın dmafiti u qyomano la haye, elo bebzabno Saleh makadle da comure d’Şigur lıgıdmaşılmi ruhaye ulıgıdmaqıbli u qyomano, u matcanle ste Boğdod u Arbil i mşalutho da hçome dıksaymolın Turkiya cal Şigur.

Camgabıdathe, u rişono du gabo di hirutho udi demoqratoyutho da Yezidoye mawdacle dı Turkiya kımnasyo adyawma dsaymo qtolcame hathe cala Yezidoye udımkamlo u mede dlıqadırwo u tukoso marıhbono dı Dacış dsamwole bi fnitho d’Şigur.

Cumer Saleh dımakadle di şalyuthfemo emwothoyo kobo aftho l’Turkiya dımdawmo udmazido a’gunhayda mqabıl da Yezidoye, ba melani ste mdawamle “gıdmaydina u hayf da sohdaydan, ugıdımhalxina bu darbaththe. Ucdo a’comure d’Şigur mtakaslın ruhaye, uklozım dmimıd hşowo ma sayome da hçomani”.