U gayso du Iraq mıdle tedbire casye cala thume d’Suriya

Ahaylawotho folhoye du gayso du Iraq, mıdlın tedbire hathe casye cala thume d’Suriya, dilonoyith athume dkıtle u Iraq camu qlimo di Gozarto d’Bethnahrin d’Suriya.

Lfuth i mawdconutho dhulın mşale folhoye Iraqoye, atedbire casyani mahti bnişo dlışofıc marıhbone mi xasra du qlimo di Gozarto la narcotho du Iraq.

U malolo du rişono gawonoyo da haylawotho folhoye du gayso du Iraq rabhaylawotho Yahya Rasul, bi maqırhonutho dhule li sferyawmo d’Alsabah Albağdadiya, mawdacle dmıdlın tedbire folhoye casye laşan dsaymi u sutoro da thume dkıtle u Iraq camu athro d’Suriya, dilonoyith athumayde dcamu qlimo di Gozarto d’Bethnahrin du garbay madınho d’Suriya.

Bi maqırhonuthayde Rasul mırle “athume du Iraq m’amnene b’şıkıl rabo, cal dıkmitıstacmıl teknoloji hatho u sayıryotho u tayısyotho du duyoqo dılo pilot. Ubebzabno u gayso Iraqoyo kımdawım acuqobayde afolhoye dıksamlın cala thume d’Alanbar, d’Aljazira udu macırbo d’Ninwe, bnişo dlışofıc marıhbone mi xasra d’Suriya la narcotho du Iraq”.

Camgabıdathe, u rabhaylawotho Rasul mawdacle da haylawotho folhoye dıksaymi u sutoro da thume du Iraq kmişakli mu gayso, d’Alhaşd Alşacbi uma haylawotho noture du thumo. U hani dilonoyith kmıfrosi calu thumo du garbay madınho d’Suriya bi xasra dkito ebe hbuşye da haylawotho d’Suriya demoqratoyto d’QASAD dıkhıbşi b’gawaye ba casrowat olufe d’marıhbone dı Dacış.