U hiğmuno d’Ninwe gzımle tlotho wazire di şultonutho du Iraq

U hiğmuno d’Ninwe Najım Cabdalla Aljabburi, gzımle tlotho wazire di şultonutho du Iraq, u gıdmonıc dşufci lan arcotho di hiğmonutho d’Ninwe, ida dlo dsaymi u mede dıknofıl aclaye u dımqadmi mşablonutho tawto lan abne di hiğmonutho.

 Aljabburi mşadarle u zuhorano la tlotho wazire, cal dkıtne man abne di hiğmonutho d’Ninwe, beynothaye i wazırto di golutho İvan Jabro dkıtyo mu camaydan.

 U hiğmuno d’Ninwe Najım Cabdalla Aljabburi, athmıl bi cohnutho du futoho d’qentrun da şuğlone bnişo dmınfıq mqabıl di batilutho, qtırle knuşyo lu tboco froso bi mditho d’Mawsal.

Bu mamlo dsımle Aljabburi gzımle awkith mhadadle tlotho wazire bi şultonutho du Iraq dkımrayşanla Mustafa Alkazimi, dlıgıtore dcubri li hiğmonutho d’Ninwe, en dılo mqadmi mşablonutho tawto la comure di hiğmonutho.

A wazire dsimi tehdid hanine: u waziro di tagorutho Calaa Ahmad, u waziro di snoco Manhal Alxabbaz wi wazirto di golutho İvan Jabro dkıtyo mu camaydan u cayıd di cito Kaldoyto. Aljabburi sımle a 3 wazirani tahdid, cal dkıtne man abne di hiğmonutho d’Ninwe, u mawxa knofıl aclaye dsaymi i wolithaththe la comure d’Ninwe dcayişi casqwotho ğalabe bıthır mu kboşo di hiğmonutho ma grube marhıbone d’Dacış.

A 2 wazire di tagorutho udu snoco qayıthwolın tuxlono mu parlamento du Iraq bu şuroyo du yarho d’İyor dşaficina, elo i wazırto di golutho İvan Jabro dkıtwa meqım mşawronitho du hiğmuno d’Ninwe dcala sebwotho da qalilotho qayıthla mu parlamento tuxlono bu şuroyo di şabtho dşaficina, cal da 3 wazirani lo maqıblowa i mraşhonuthathe bu zabno du quwolo dsımwole u parlamento cali şultonutho du rişwazire Mustafa Alkadhimi.