U Hiğmuno d’Ninwe sımle socurutho li qastra d’Bağdede

U hiğmuno d’Ninwe Najım Aljabburi bi socurutho dsımle li qastra Suryoyto d’Bağdede bi daşto d’Ninwe, mıstaqbıl mu qaymaqam ardixlo Cisam Buhnam Matti.

 Bi socuruthathe, Aljabburi dkarıx beyn da tarmiyotho du bnoyo u hethotho dsimi, mawdacle dkito ğalabe yaqrotho mu camaydan dkıbci ducri ucdo l’Bağdede bıthır mu şuşoto dhawi bu benyonayda u tahtoyo.

 U hiğmuno d’Ninwe Najım Aljabburi cam menyono d’rişone da şutose d’Ninwe, athmıl casriye sımle socurutho li qastra d’Bağdede bi daşto d’Ninwe, u mıstaqbıl mu qaymaqam Cisam Matti. Aljabburi cami taşdartayde wu qaymaqam, karixi beyn da tarmiyotho di mşablonutho kenşoyto u du bnoyo u hethotho d’Bağdede.

Aljabburi bu mamlo dsımle, mahwele ithnihuthayde cala tarmiyothani dkamili bi qastra d’Bağdede, u mırle; Sim fulhone rabe hol dkamili a tarmiyothani, ubu zabno da 2 yarhe dıbqamuthayna i sagiyutho da tarmiyotho gıdkımli u gıdmihathıth me hatho u benyono tahtoyo dshıfle u tukoso marhıbono d’Dacış. Ono farsufoyith bıthır mu mede dşamıcne mu qaymaqam hawili sabro rabo, d’menyono celoyo ma Mşihoye dkıtne b’Boğdod u bı Caynkawa kıbci ducri la botathe bi qastra d’Bağdede, u bebzabno 70 yaqrotho dkıtne galwoye b’Yurdnon kıbci ducri l’Bağdede. U mabco du dcoro da galwoyani latyo mede dıkmisım me qumruhe, elo a yaqrothani mawdaclın dkıbci ducri l’Bağdede bi netije da esore dhawilın cama yaqrothathe camu ahılathe dkıtne harke, u haniste mşajaclın ayaqrotho galwoye lu dcoro bi netije du şuşoto di aykanoyutho di mşaynutho u di mşablonutho kenşoyto.