U hudro Suryoyo dı Derik bi mditho d’Enşxede mabdele kampanya di mcadronutho la Armınoye

U hudro Suryoyo dı Derik bi mditho d’Enşxede d’Holanda, mabdele kampanya di mcadronutho du camo Armınoyo dkıtyo sniqoyo bu qlimo d’Nagorno Qarabax.

 Bu taro di kampanyathe, u hudro da Suryoye dı Derik maltamle 25 sanduqe dı lbuşe hathe du sathwo, bnişo dmaxifi i casqutho du camo sniqoyo

 U hudro da Suryoye dı Derik dkıtyo bi mditho d’Enşxede bu athro d’Holanda, mabdewole kampanya du teltimo dı lbuşe hathe du sathwo dlatne mıstacımle, bnişo dmişadri xıd mcadronutho la n’Armınoye dkıtne sniqoye bu qlimo d’Nagorno Qarabax.

Mu zabno dmabdewola i kampanyathe u hul ucdo, maltım 25 sanduqe d’lbuşe hathe u lbuşe hrene tahtoye du sathwo, u acmayeste kmoyutho dılhefat u battaniyat, laşan dmastıri anacime wa sobe dıkşıfci ucdo b’aykanoyutho casqo mfothıd du qrobo qaşyo dhawiwo bayn d’Armenya u Azerbaijan bu qlimo d’Qarabax.

A’25 sanduqani maltımi b’zabno d’10 yawme ma hadome du hudro dı Derik d’Enşxede u m’farsufe hrene mcadrone dkobın bido ftıhto.

Athmıl masılmi a sanduqani lu kohno di cito d’Mor Ğriğoryos da n’Armınoye Ortodoksoye dkıtyo bi mditho d’Almelo b’Holanda qaşişo Maştots Bağdasaryan, wadyawma u kamyon dmatcın a sanduqani maftele fothe lu athro d’Armenya laşan dmitasılmo i mcadronuthathe la sniqoye d’Qarabax.

U mşalo du hudro dı Derik d’Enşxede Garo İshaq, bi maqırhonutho dhule l’Suroyo TV, mırle “laşan dmahwena awyutho camu camo Armınoyo dıkşofıc ucdo bı maşıqlo casqo, mşrewolan ba yawme dşaficina i kampanyathe, cal da n’Armınoye wa Suryoye hıdo ctidutho kıtlın, wa tıre came şafici mu qtolğenso du Sayfo, mawxaste b’hawxa şartat casqe klozım dnıfqina moro lıhdode”.