U Huyodo d’Urifi naqla hreto mzaharle Turkiya

U Huyodo d’Urifi naqla hreto mzaharle Turkiya calu qedomo dkıtla bi sbutho du kroxo dcalu nafto bu madınho du Yamo Mescoyo.

 Camgabıdathe, u Yawnan mawdacle dımşare ba fulhone du şetoso d’nuqazto hreto folhoyto bi gozarto d’Krita, ubebzabno mawdacle dgıdmaqwe i methcadronuthayde cam Amerika bu haqlo di mşaynutho folhoyto.

 U rişono du mawtbo d’Urifi Charl Mişel mşadarle zuhoro l’Turkiya calu qedomo dkıtla bi sbutho du madınho du yamo Mescoyo, u mırle “dothe dlımhalxo Turkiya b’darbo towo laşan u şroyo du krizano, i naqlayo a darbone kulle ftihene qum du Huyodo d’Urifi laşan dımdafıc ayuthronayde. Mişel mawdacleste bi ytawto da rişone da nathrawotho du Huyodo d’Urifi dgıdmitaybo ramhıl bi mditho d’Bruxel, balhude gıdmıdroşo i sbutho da nesore cam Turkiya, wi aykanoyutho bu madınho du Yamo Mescoyo. Lfuth u rişono du mawtbo d’Urifi Charl Mişel, u nişo du knuşyo d’Bruxel dmitayıb wahdo du diyalog banoyo cam Turkiya, laşan dmitarkıwo i mşaynutho wi şalyutho bi fnitho kula, u dmitahwe iqoro kamilo li morutho da tıre athrawotho u Yawnan u Qufrus.

Megabo hreno, u waziro du sutoro du Yawnan Nikos Panajyotopolos mawdacle dhule xabro lu parlamento, dımşare ba fulhone du şetoso d’nuqazto folhoyto trayonitho bu xalij d’Suda bi gozarto d’Krita. U waziro Yawnoyo mawdacle dımde cal tıre qyome cam Amerika bi sbutho di tahrazto du tehwiyo du nafto la haylawotho oyaroye u du yamo da tıre athrawotho. Bu mamlo dsımle Panajyotopolos li sictho du sutoro uda sebwotho baroye bu parlamento d’Athina, mawdacle du fusqono du bnoyo d’nuqazto hreto folhoyto athi luhwoyo bu taro da şartat ducdo dıkjıbri u Yawnan dmaqwe u haylayde bu madınho du Yamo Mescoyo. Mawxaste i nuqazto du yamo d’Krita sniqoytoyo lu hethotho u lu teqwiyo. Panajyotopolos mathkarleste dıkmıntır ba kımo yawme dıbqamuthayna, dmihathıth u qyomo di methcadronutho folhoyto bayn du Yawnan u Amerika. Meqım mathe, u waziro di baroyutho d’Amerika Mayk Pompeo bi ytawto dhawile athmıl camu rişwazire du Yawnan, mawdacle di nuqazto hathto bi Gozarto d’Krita gıdhuyo qentrun la sfinotho Amerikoye.

Mexasra hreto, u senator Amerikoyo mu gabo demoqratoyo Bob Menendez, mawdacle di mdabronutho d’Waşington klozım dlımqadmo fayış l’Turkiya xıd hawro dmeqım, elo lfuth u qedomo dkıtla ucdo bu zabno d’Erdoğan. Bi maqıblonutho dsimo acme bi dafo Yawnoyto The Greek Cornet, u senator Menendez mırle “anesore di kongre d’Amerika ğalabe mwatyene cami mdabronutho d’Waşington, cal dlımid hul ucdo hşowo m’Turkiya mqabıl di mudaxala dıksaymola ba maye qlimoye du Yawnan ud’Qufrus”.