U Huyodo Suryoyo d’Urifi ESU frisle egartho du cedo di qyomto

BRUXEL – Bu şuroyo di egarthathe dfrısle u Huyodo Suroyo d’Urifi-ESU komır; Bu yawmano, a Qatholiqoye dbritho kmıstaqbılo u cedo di Qyamto d’Moran Yeşuc Mşiho xıd remzo da haye hathe udu sabro. A Mşihoye Qatholiqoye dbritho wu camaydan u Kaldoyo Suryoyo Othuroyo Oromoyo bu athro ubi golutho’ste mıstaqbele i qyamto d’Mşiho b’fsihutho rabtho.

ESU mırle; Ba hezwone dfrisi mu athro calu camaydan-fsihutho rabtho’wa dıkmahwın i masirutho dkıtle ba şerşe du athro dan abohothayde. Mu Cıraq uhol Suriya u Lebnon-ban mowat dıbnaynoşo mcayadlın u mathyo du cedo walaw kito ğalabe qetre, casqotho u krize bu qlimo. Bu zabno da Qatholiqoye dbritho kımcaydi u cedano, a citotho Orthodoksoyotho kımathkıri i şabtho du Haşo u kımtaybi ruhaye lu cedo.

Hani zıttır me 10 eşne u bıthır mu kboşo d’Dacış cali daşto d’Ninwe, adşato hawi mıştawtıfonutho rabtho la zawhe tawdithoye dsimi u dımrayşıni mi qadişutho du fatıryarxo di cito Suryoyto Qatholiqoyto b’Bağdede u hedora. Bu Cıraq mıstaqbelın a Mşihoye u cedano di qyamto ubı Suriya’ste hawi şuşoto rabo. Bıthır ma droşe dhawın, a gabe folitiqoye du camaydan mdelın qyomo du fhomo leşan dmaşın fulhone mşawtıfe bu haqlo da zedqe du camaydan b’Suriya.

Bu huthomo di egarthayde ESU mırle; Bi sbuthathe ahna xıd ESU b’fsihutho kmıstaqbılina u şuşotano u kımhaymınina dgıxolıq şuşoto u maşıqlo hatho leşan u camaydan. Bi cohnutho du cedano di qyamto d’Mşiho, kısaymina qroyto lu camaydan b’britho kula, d’sonıd u athraydan u dfoyış masro ebe. Cal ışme d’ESU wa tukose hadomayde, kıtulbina cedo mbarxo u malyo fsihutho lu camaydan ula Mşihoye dbritho kula u kıtlan sabro du yawmano, dmamte camruhe sabro, şlomo u hulmono li noşutho kula.