09/03/2021

U kenşo Emwothoyo ksonıd u renyo dmişatıs mawtbo folhoyo gawonoyo dımdabır Suriya

U amnoro mşamho d’Suriya Jamal Sleman dkıtyo saqıbloyo du rejim, mawdacle du kenşo Emwothoyo ksonıd u renyo dmişatıs mawtbo folhoyo gawonoyo, bnişo dımdabır u athro d’Suriya bu maşıqlo hatho.

 Bebzabno, Sleman bi maqırhonutho dhule mawdacle dıkmıtyaqın du mawtbo folhoyo mşawtıfo, kibe dnoqıl Suriya laf athro di kinutho u da qonune, dilonoyith bıthır mıd lo makşarlın a insiyative Emwothoye u Caraboye bu qefoyo duşroyo lu kriz folitiqoyo d’Suriya.

 U amnoro mşamho d’Suriya dkıtyo bebzabno mi saqıbloyutho di taşdarto d’Mosko, bi maqırhonutho dhule lu tboco froso Caraboyo, mawdacle da renye u insiyative dımqadmiwo awste a’fusqone emwothoye dımbayniwo heş mu zabno du mathlono emwothoyo qamoyo Kufi Anan uhulu zabnano ducdo d’Ger Pedersson, lımakşarlın dmaklın u qrobo dıhsıdle i ruho d’mowat alfayo d’bnaynoşo, udlıqadır d’noqıl Suriya lafu maşıqlo folitiqoyo hatho awkith laf sistem demoqratoyo dkımmathıl a’Suriye kulle du athro.

Sleman mırle “a’fulhone d’Astana bi rişonutho d’Rusya mawladwolın bıthır m’ytawyotho yarixe i sictho du nomuso esonoyo xıd nuqazto du cboro lu maşıqlo folitiqoyo hatho, elo u rejim mahrawle a’fulhone di sictahthe dhani zıd m’şato lıqadiro dımbayno ulo mluwo, ubi netiçe di aykanoyuthathe ucal dlıfayoş sabro bu şroyo folitiqoyo, athi luhwoyo u renyo du mawtbo folhoyo zabnoyo xıd darbo laşan dmitafıt la haye u fusqono da 2254 du mawtbo di mşaynutho d’Emwotho Mhaydotho, udmınqolo Suriya l’athro di kinutho uda qonune”.

Calu şuwolo ida dıkmiayıd u şekolo du mawtbo folhoyo mşawtfo d’Suriya, Sleman mırle; u renyano kmıdrış ucdo bırwihutho bayn da grube saqıbloye mşahılfe, baynothaye dkımaydile ubaynothaye ste dıkrıfdile. Kito ste saqıbloye dıkzayci mawxa şroyo, elo i zuctho dkito gıdmılhoyo bu zabno dmıdroşo ebe i sbutho du mawtbo folhoyo b’şıkıl zalilo u ftiho. U rejim krofıd u renyano ulıkmaqbılste ulo şroyo dıkmawbıl Suriya lafu maşıqlo folitiqoyo hatho. Bebzabno, u şekolo du mawtbo kmiayıd mu wahdo emwothoyo, elo hul ucdo u kenşo emwothoyo ruşmoyith lısnıdle u renyano.

Camgabıdathe, u amnoro saqıbloyo Jamal Sleman mawdacle du mawtbo folhoyo mşawtfo gdımrayşın u maşıqlo folitiqoyo zabnoyo dgıdhowe hassas u mhilo, u mawxa klozım dhowe sebyono emwothoyo qawyo laşan dmisım u sutoro du maşıqlano, udmitahwe aftho lu mawtbo dmafıt la haye u fusqono da 2254.Cali ctidutho du rejim d’Suriya Başşar Alasad, u amnoro Sleman mırle “dothe dmiayıd u renyo du mawtbo folhoyo ma gabe mşahılfe, i naqlayo i manfaca celayto d’Suriya gıdhuyo rabtır mkul farsufo, aw gabo awste grub”.

Check Also

U parlamento d’Australia tlıble mi şultonutho du Iraq dımşatso şultono yothoyo lu camaydan dıkhoye bi daşto d’Ninwe

U parlamento federaloyo d’Australia, bıha femo tlıble mi şultonutho du Iraq dımşatso şulto…