U Koalisyon da Tukose du Cameydan sımle qreyto dmitawde bu qtulcamo d’Simele

Koalisyon rabo d’tukose şarye du camaydan u Othuroyo b’Chicago d’Amerika, sımle qroyto li şultonutho qentrunoyto d’Boğdod u li şultonutho du qlimo d’Kurdistan, dmawdın bu qtolcamo dsim calu camaydan b’Simele.

 Bebzabno u Dawqo Othuroyo da zedqe noşoye, bi hfitutho dsımle b’Lindköping du Swed, mathkarle a Sohde d’Simele.

 Koalisyon d’35 d’tukose şarye du camaydan u Othuroyo bı britho mdelın cal egartho mşawtafto u sımlın qroyto eba li şultonutho du Iraq u li şultonutho du qlimo d’Kurdistan dmawdın bu qtolcamo dsim calu camaydan ban 1933 b’Simele u bebzabno, dnufqi moro la dukotho dıkhoye u camaydan ebeye.

I egarthathe friso, bu zabno dkito plan dmisım hfaryotho bi duktho dhawi u qtolcamano. Elo kitoste zuctho, da hfaryothani dobın husrono la ithbate ulsoye dkito leşan maşıqlo di kinutho. Bi egarthathe mawdıc, du qtolcamano d’Simele hij lo mid lu makthabzabno du Cıraq, elo leşan u Cıraq dhowe athro b’tolerans u mşaklo me came mşahlıfe, klozım dmitıctarıf ba hawbe dsimi bu dacbar.

Bi egarthathe hiw mawdconutho rwıhto calu qtolcamo sistematik dsim calu camaydan wa hjome dsimi cala qıryawothayde. A tukosani, kıtulbi dmihafıd cala dukotho du camaydan, dmimıd tedbire u dmitahwe tazminat la yaqrotho da dıbhe. Mawdıcste di egarthathe gıdmişadro la mathlone d’Amerika leşan dmıgrış u zuhoro calu qtolcamano u dmihaşwi a hayobe.

Me gabo hreno calu duxrono şatonoyo da Sohde Kaldoye-Suryoye-Othuroye d’7 Ob mtayable u Dawqo Othuroyo da Zedqe Noşoye b’Lindköping duxrono u sımle mamle cali mıcne du yawmano, u mahke cala qtolğense dsimi calu cameydan. Be bzabno sim Qurobo Alohoyo bi rişonutho d’Xuroyo Eyub Stefan dımqadamle slutho cali ruho da Sohde dhulın a hayathe qurbono lu cameydan.

Abuna Xuroyo Eyub Stefan, Muşe Dawud mi knuşto d’Urhoy, cal ışme d’Zawca Şumir Elbazi, Said Nison cal ışme di mdabronuıtho di Knuşto Marduthoyto Othuroyto b’Norköping mqadamlın mamle calu yawmano. Bu huthomo u rişono du Dawqo Cemil Diyarbakirli mahkele cala Sayfe dhawın calu cameydan u mırle; İ hdoyuthoyo dıkmamtolan lu nişeydan.