06/06/2021

U koalisyon Emwothoyo dkıtyo bi rişonutho d’Amerika mşadarle lojistik folhoyo li foquduthayde dkıtyo qarıwto li Hasake

U koalisyon Emwothoyo dkıtyo bi rişonutho d’Amerika, mşadarle lojistik folhoyo li foquduthayde dkıtyo qarıwto li Hasake bi Gozarto d’Bethnahrin. Bebzabno mawdıc, du koalisyon mşadarle radoyotho folhoye la hayle Iraqoyeste.

Me gabo hreno a rabayhaylawotho d’Amerika udu Iraq, hawilın ytawto bu taro da droşe stratejikoye dkito beynothaye, bi sbutho du groşo da folhe Amerikoye mu Iraq.

Bu zabno dıkmdawım u ağono mqabıl da ğrobe marhıbone d’Dacış b’Suriya ubu Iraq, kımdawım’ste u koalisyon Emwothoyo dıkmirayşın me Amerika bu nqolo d’lojistik folhoyo la hayle bnayqyomo du garbyo d’Suriya-awkith a Haylawotho d’Suriya Demoqratoyto ula hayle di mşaynutho du Iraq.

Calathe athmıl, macbır konvoy rabo li foqudutho d’Amerika bu taymno di Hasake. U konvoyano dıkmişakalwo me 3 qamyune u 2 radoyotho folhoye matcıne zayne u buğre azze li foquduthathe dkıtyo bi Şaddade. Bebzabno, u koalisyon mşadarle’ste athmıl konvoy d’45 radoyotho folhoye lu gayso Iraqoyo leşan dmısnıd bu ağonayde mqabıl d’Dacış.

Camatheste mawıd du rabhaylawotho Iraqoyo Abdul Amir al Şammari laqi athmıl u bar’amnayde u Amerikoyo Paul Calvert, leşan dkolın calu dialog stratejikoyo dkito beyn da 2 athrawotho. Ba droşaniste kle cali mekanizma ucalu zabno du groşo da folhe du koalisyon Emwothoyo mu athro u layko gıdmişadri bıthır a folhani.

Bı şuşoto hreno dhawi adyawma bu Iraq, mawdıc dmafır 2 tayosyotho dlo pilote cali foqudutho oyaroyto dkıtyo bu qlimo d’Anbar. A tayosyothani madrın meqım dobın husrono li foquduthathe dkiba folhe Amerikoye. Meqım ma 2 tayosyothani, mafırwo’ste soruho hreno lalcıl du bethtawso Emwothoyo d’Boğdod wu gawonoyith ba hçomani lawi husrono noşoyo.

Check Also

U şutoso d’Olaf Taw frısle buyono lu ray gawonoyo du camaydan

U şutoso d’Olaf Taw bu buyono dfrısle adyawma lu ray gawonoyo du camaydan, mawdacle dhın m…