U komisyon da zedqe noşoye du Iraq mahwele hfuxyo mqabıl da gedşe dhawın bi Slemaniye

U komisyon da zedqe noşoye du Iraq, bu hfuxyo dmahwele mqabıl da gedşe dhawın bi hiğmonutho di Slemaniye, rfıdle i siyase du sxoro du femo u du mnoco da tagılyotho mşayne, u krıhleste u haylo dıkmitıstacmıl mqabıl da mtagılyone.

 Camgabıdathe, u komisyon sımle qroyto li şultonutho d’Boğdod ud’Arbil dımsarhıbi bu şroyo da qetraththe, bnişo dmisım u garanti dmişarıri a talabe da mtagılyone.

u komisyon da zedqe noşoye du Iraq frısle adyawma buyono cala gedşe mahişone dhawın bi hiğmonutho di Slemaniye bu qlimo d’Kurdistan bu garbiyo du Iraq. Bu buyonayde u komisyon mırle “hani tlotho yawme b’zuhoro rabo kımcaqbina a’tedbire qaşye ulo qonunoye dımbaynila i şultonutho d’Arbil bu qedomayda lafa tagılyotho du protesto dkımtalbi dmitahwelın a’bnaymothoye du qlimo d’Kurdistan a’zedqaththe a’qonunoye lfuth u nomuso esonoyo”.

Bebzabno, u komisyon da zedqe noşoye rfıdle i siyase wa tedbire du sxoro du femo udu haylo qaşyo dıkmitıstacmıl mqabıl da mtagılyone du protesto wu sxoro da froshezwe. U medano kımathır mrimonoyith cala zedqe mdinoye, folitiqoye, ucali hirutho du renyo ucala tagılyotho mşayne.

Callathe, u komisyon sımle qroyto li mdabronutho da haylawotho di mşaynutho di Slemaniye, dımyaqro a’zedqe noşoye udlısaymo hboso cali hirutho du renyo.

Camgabıdathe, u komisyon da zedqe noşoye du Iraq tlıble ma tarte şultınwotho d’Boğdod ud’Arbil dımsarıhbi bu şroyo da qetrathe, bnişo dmisım u garanti dmişarrıri a’talabe qonunoye da mtagılyone.

Ba yawme dşaficina, mtayıb şişaltho dı tagılyotho bi hiğmonutho di Slemanye xıd hfuxyo mqabıl di şultonutho du qlimo d’Kurdistan, cal dlıkobo an’ağre awkith a’mcaşe du yarho la fqide ula falohe ba şutose du qlimo.