U kriz du momuno d’Lebnon xlıqle şwolo bu nafto

U kriz du momuno d’Lebnon xlıqle şwolo bu nafto, calathe u gayso mdaxele bi sbutho u mahıtle ido cala nuqazyotho du benzin udu mazot.

 Cam gabıdathe i bethkrihe Amerikoyto d’Lebnon mawdacla mu şwolo du kahrıbo uda jeneratöre kito risk dcayşi gunho, wa haye da kayiwe bi tahlukane.  

U gayso d’Lebnon mawdacle gıdsoyım mudaxala lu şwolo dmo mbayın u timo du nafto. Athmıl u gayso sımle i mudaxala qadmoyto. Bu athro sımlın cuqobe cala nuqazyotho du benzin dı sxırre u tehwiyo du benzin udu nafto u mahıtle ido aclayye. Wu gayso mşarele dobe u benzin wu mazot dlo zuze lu camo.

U gayso me meqım huwole maqırhonutho bi dafayde u mawdacwole calu cuqobo dıgıdsoyım. Lebnon kcayşo u kriz momunoyo rabo da 30 ışne haroye.

Me gabo hreno i mdabronutho di bethkrihe d’Beyrud di bethsawbo Amerikoyto dkıtyo b’Lebnon mawdacla, cal layto kahrıbo u cal dlo mıqdır dmitaqisi a jeneratöre mfothıd dlayto nafto mzaharla ba mowat kayiwe a hayathe bu qentone.

Bi maqırhonutho dı frido kmitawdıc, ma şwole du kahrıbo udu nafto me yawmıd dı tre kito risk dlıqıdri dobın xıdme bi bethkrihe mawxa kibe dhowe gunho rabo. Kito 55 farsufe dkıtne masre bi ale du myodo du nafas mawxa kibe dmaythi. 180 kayiwe dkıtlın şwolo ba kılwataththe kibe dmisamımi cal dlaybın dcıbri bu diyaliz.

Calathe i bethkrihe sımla qroyto l’Emwotho Mhaydotho ula şutosathayda, lu tukoso du hulmono dı britho, lu fon di mcadronutho d’Emwotho Mhaydotho tlıbla mcadronutho msarhabto.

Cam gabıdathe hani tlotho yawme ma şuce dsafrayto bğalabe ma qlime du athro d’Lebnon u camo kole ba şuce quma nuqazyotho du benzin u lo qıdri dşıqli benzin. Bcayni zabno u camo lo qodır dmaqıth a jeneretöre cal dlayto nafto, mi cılthathe a bethkrihe a farme u şutose hrene kımnasın dmaşmıci u qolaththe la mşale.

B’Lebnon mu şwolo du döwiz, kmıgrış casqutho dmiqafe nafto la jeneratöre mawxa bu athro kule hani ba şabe bu yawmo 20 şuce layto kahrıbo.