U matcımo d’Barolo dkıtyo dha man abne du camaydan bi karxutho d’Södertalje du Swed, mid nişo l’hçomo du zayno

SÖDERTALJE, Swed – Kmo şoce meqım mu hçomo dsim calu matcımo d’Barolo dkıtyo b’Maren bu qentrun di karxutho d’Södertalje, frıswo egartho d’gzomo bi sosyal media mqabıl du moro du matcımo. Bıthır ba şoce du lalyo, mhe 3 buğre ba şaboke du resturang.

Ba şoce du lalyo azze u polis azzewo li duktho du hçomo bıthır mıd matile xabro elo lo mqafewole mede. Der yawmo, mqafele u polis bu noquso 3 dukotho da şaboke şafici a buğre du zayno ebeye. Mawdıc da farsufe dıkmıthomi bu tewzico du moro du matcımo, mhalaqwolın’ste foquctho di ido qariwo l’bayto b’Rönninge.

Cal du hçomo sim b’lalyo, noşo’ste lo mçarahwo. Calathe u polis Swedoyo, kıhoyır jıddi bi sbuthathe u mırle; Bi idactho du mede dhawina. Kıtlan haj cala gzomani dıkmisomi u mıdlan tedbire mqabıl dıthe. Camhbol, fayış a gunhani hawın mede kyonoyo ba hayaydan.

Mawdıc d’farsufo dkıtwa fothe mkasayto u rawoco cal darıxto, sımle u hçomano cal Barolo. U moro du matcımo’ste mawdacle dkıtne b’şok u hzinoye’ne calu mede dhawi elo bebzabno mqadamle a tahınyothayde lu polis lkull ha dımahwelele snodo.