U mawtbo da citotho du madınho mescoyo mzaharle mu şğuşyo rabo dkito ucdo b’Lebnon

U mawtbo da citotho du madınho mescoyo, mzaharle mu şğuşyo rabo dkito ucdo b’Lebnon, cal dkibe dhowe şuroyo du maşıqlo haroyo du fırfoso du kenşo udu athro.

Bu hfuxyo dmahwele u mawtbo citonoyo calu furqoco d’Cakkar, tlıble ma şutose ruşmoye d’Lebnon dnıfqi moro lu mede dfayış mi şalyutho d’Lebnon.

U mawtbo da citotho du madınho mescoyo bu buyono dıfrısle athmıl lu tboco froso dıqle u noquşo du qento dkito cali aykanoyutho d’Lebnon xıd athro.

U mawtbo bu buyonayde mawdacle di aykanoyutho dmatila adyawma Lebnon dilonoyith bıthır mu gedşe mahişono du fuqroco udu yuqdono dhawi bi fnitho d’Cakkar, ktılbo b’surhobo dmimıd tedbire lo kyonoye, bnişo dmışroyi a’şartat casqe dşafici maşıqle dlıkmitaqıbli.

U buyono citonoyo komır “u şğuşyo rabo dıkmahwe ba şıklat mşahılfe da haye d’Lebnon, ida dlımışre b’tedbire şerşoye kibe dhowe inaqlayo şuroyo du fırfoso haroyo du kenşo udu athro, ubu şıklano Lebnon kibe dmişahlıf l’qoz bayna bazare emwothoye dıkmıntır dhowın calu qlimo du madınho mescoyo”.

Camgabıdathe, u buyono mawdacle di awyutho wi methcadronutho dhawyo bayn du camo di fnitho d’Cakkar baroyo bıthır mu furqoco, kdımyo li awyutho dmahwewole u camo b’fenyotho hrene du athro, wu medano kmadıl di awyutho kenşoyto bayn da Lebnonoye fayişo qımto cali rağlo cıl mi casqutho, mi fıqriye umu fasad dkito bu athro. Mawxa ste u mawtbo da citotho du madınho mescoyo kmıtyaqın dıklozım dmınfıq moro la timoyothani du camo dkobın sabro l’dactid hatho l’Lebnon.

Bu huthomo du buyonayde, u mawtbo citonoyo tlıble ma şutose gawonoye d’Lebnon dsaymi u mede dıknofıl aclaye, bnişo dmınfıq moro lu mede dfayış mi şalyutho d’Lebnon, u mawdacle ste dkıtyo hadiro dsoyım ba yawme dıbqamuthayna, u mede dıkhozele ulsoyo dmisım bu haqlo du snodo udi mcadronutho kenşoyto.