U Mawtbo da fatıryarxe uda hsayo Qatholiqoye d’Suriya simle qroyto li hdoyutho Mşihoyto
HIMIS, Suriya – Bu taro di tahrazto di socurutho dıksamla la citotho Qatholiqoye d’Suriya, u rişono di sunados da citotho Mşihoye du Vatikan kardenal Klaudio Gojirotti laqi athmıl safrayto bu mawtbo da fatıryarxe uda hsayo Qatholiqoye d’Suriya, bi baytoyutho du qentrun di hasyutho d’Hımıs da Suryoye Malkoye Qatholiqoye.
Li ytawtathe, mıştawtafle i qadişutho du fatıryarxo da Suryoye Qatholiqoye Mor İğnatiyos Yusıf Tlithoyo Yunan, i qadişutho du fatıryarxo da Suryoye Malkoye Qatholiqoye Mor Yusıf Alcıbsi, u rişızgado du Vatikan b’Suriya kardenal Mario Zinari, u notarrozo di sunados da citotho madınhoye du Vatikan hasyo Mişel Çalax wa hsayo hadome du mawtbo da fatıryarxe uda hsayo Qatholiqoye d’Suriya cam menyono d’xuroye u kohne ma marciyotho Qatholiqoye mşahılfe di mditho d’Hımıs.
Fatıryarxo Yunan bu mamlo dsımle b’ışmıd du mawtbo mırle “kıtlan sabro dhowe u mamlaydan mhaydo. A’hrene dlıkmıştawtıfi li haymonuthaydan, in dhowe b’Suriya awste bu Ciraq kımqadmilan xıd Mşihoye ulo xıd camo dilonoyo. Mawxa klozım aclayna dhowina sohude li hdoyuthathe i Mşihoyto. Ahna layto sidayna sagiyutho Mşihoyto u qalilutho Mşihoyto, ahna kulayna xıd Mşihoye camıhdode kcayşina i casqutho di xalyutho folitiqoyto udi golutho dkuyo aclayna dilonoyith i claymutho”.
Fatıryarxo Yunan bu mamlayde ste mawdacle du sabro dkıtlan ahna a’Mşihoye dcayşina i şarirutho di hdoyutho yo, u grışle u zuhoro cala slawotho dmaqimi bi şabtho dşaficina laşan di hdoyutho da Mşihoye, u mırle “bu darbo di hubo klozım dhowina sohude li şarirutho. Kulayna camıhdode b’ha lebo ub’ha qolo”.