Masrıh kohno hatho li cito Suryoyto Orthodoksoyto d’Mor Afrem bi mdito d’Stanbul

STANBUL – 6 bu yarhano d’Konun u haroyo, masrıh şamoşo Andreas Gürkan lu darğo d’qaşo li cito d’Mor Afrem d’Stanbul. U zawho di masırhonutho du kohno hatho, simo mi mcalyutho du hasyo Mor Filksinos Yusuf Çetin-u hasyo di marcitho d’İstanbul, Ankara u İzmir. Abuna Andreas Gürkan, u kohne qamoyo dıkmitasrıh bi cito d’Mor Afrem.  

Lu zawhano’ste, hadır mathlone mi cito Suryoyo, mi cito Kaldoyto, mi cito Qatholiqoyto umi cito Armınoyto. Abuna Andreas mawlıd ban 1985 bi qritho Kfarze elo cayışwo bi mdito d’Mıdyad. U kohno hatho, u abro du mhasyo Çırço u Saro dcayişi b’Mıdyad elo dkıtne bu şerşo Kfarzoye umi iqartho dbe Davo Mırado. 

Abuna Andreas qrele u yulfono Suryoyo bi cito d’Mor Barsawmo qum ide d’malfono Aykan Gürkan-dkıtyo u ahunayde. Qrewole 3 yarhe bi dayro d’Mor Augin bu Turo d’İzlo u sımle malfonutho kmo eşne bi cito d’Mor Fetrus b’Adiyaman. Qaşo Endreas Gürken mzawağwo ba 2022 a hayayde cam Luvisa Korkmaz dkıtyo mi qritho d’Ciwardo u kıtle hdo bartho. 15 bu yarho d’İlül dsafıcina masrahwo şamoşo.