U Mawtbo tahtoyo d’Amerika maqbele u şuhlofo du qonuno du snodo da qalilotho du Iraq

U Mawtbo tahtoyo d’Amerika, maqbele u şuhlofo du qonuno du snodo da qalilotho du Iraq. Bu quwolo dsim bu Mawtbo tahtoyo, i sagiyoyutho da hadome m’ayade di şultonutho d’Woşington klozım dfulho cam Boğdod, leşan a qalilotho di daşto d’Ninve dqudri ducri b’mşaynutho la dukothathe a şerşoye.

Bu şuhlofano tlib’ste, dhowe mlahmonutho beyn da hayle folhoye da qalilothani dhzelın yulfono folhoyo mu koalisyon Emwothoyo.

U Mawtbo tahtoyo d’Amerika, maqbele i rmoyto da 28 d’Sherman leşan i şato da 2022, dıktulbi dmitahwe snodo lu camaydan ula Ezidoye di daşto d’Ninve. U talab du şuhlofano mqadamwo meqım zabno mu hadomo di kongre mu gabo demoqratoyo Brad Sherman. Bi rmoytathe dmaqbılo, tlıbwo mi şultonutho d’Woşington dfulho cam Boğdod leşan dqudri a qalilothani ducri bu sebyonathe ubı mşaynutho la dukothathe a şerşoye bi daşto d’Ninve.

Bu şıkılano, klozım i wazirutho di baroyutho d’Amerika dımbayno stratejim u tedbire leşan u snodo da qalilothani bu haqlo folitiqoyo, dımdabri u dımamni ruhaye ba dukothathe di daşto d’Ninve bi methcadronutho da mşale federaloye. Mawdıc du teqbilo di rmoytathe, gıdfotıh qum d’sisyase hathto lu terkiwo d’şartat towe leşan u sutoro wi mşaynutho uli şawyutho leşan a Suryoye Othuroye uğer qalilotho dkıtne mhile bu Iraq.

Bu tarano gıdmitahwe mkono la Suryoye Othuroye dqudri ducri b’mşaynutho la dukothathe bi daşto d’Ninve u hathe kıtla ulsoyutho rabtho lu camano dıkhoye b’Amerika. Bi rmoyto dımqadmowole Sherman ba 2018, mbayanwole USAİD ba milyone dolare xıd mcadronutho lu camaydan ula Ezidoye di daşto-bu taro du snodo da qalilotho dmafitiwo bu qtolğenso da marhıbone d’Dacış.

Bu snodano, kmitahwe mkono dhowe mlahmonutho da hayle folhoye da qalilothani dhzelın droşe folhoye ma hayle du koalisyon Emwothoyo u dhowın hayle ruşmoye u aminoye ba şutose du athro. İ rmoytathe d’Sherman dmaqbılo bu Mawtbo tahtoyo, gıdmitaslıqo ucdo lu Senato leşan dmıdroşo u bıthır gıdmitaslımo lu rişono leşan dmodela xıd qonuno.