11/05/2022

U mgabyo di qritho du camaydan Baradaş msik mu Asayiş di KDP

Naqla hreto, a comure Kurdoye dkıtne qariwe li qritho du cameydan Baradaş dkıtyo b’Sersing d’Nuhadra du Cıraq, sımlın hçome cala comure-u dilonoyith calu mgabyo di qritho. Bıthır mi qale dhawi beyn da comure uda Kurdoye, u Asayiş di KDP msıkle u mgabyo Ziya Minas Athar u mhelın la clayme di qritho.

11/05/2022

CIRAQ – Latyo inaqla qamayto dkowe hçome ma Kurdoye du qlimo d’Kurdistan du Cıraq cala qıryawotho du cameydan. Wu bhın dukotho kbışlın a mulkone da qıryawotho, ucdo’ste a comure dhedor a qıryawotho d’Baradaş dkıtyo b’Sarsing hcımlın calu mgabyo di qritho dnafıqwo d’dowır i raceyde. Bu video dımsawır mu claymo Othuroyo Kaldoyo Suryoyo James Albazi kımahwe ftiho aydarbo a Kurdoye kımohın lan abne di qritho d’Baradaş.

Bıthır mi qalathe athi u Asayiş di KDP u msıkle u mgabyo Ziya Minas Athar, u msawrono du video Jamez Albazi u kmo farsufe hrene man abne du cameydan. u tbocofroso qlimoyo mawdacle dlo msik noşo ma Kurdoye. Be bzabno u qoyumo catiqo du camaydan bu parlamento du Cıraq Josef Sliwa frısle u tebanobi dafeyde du nawlo u dafe du tbocofroso du İraq frıslın i mawdconuthathe dhule u qoyumo.

Me gabo hreno u rişono zawgoyo du Huyodo Suroyo d’Urifi-ESU Fahmi Vergili mawdacle dkıtne mcaqbone di sbuthathe u dlıkmaqbli hawxa hçome calu cameydan. Vergili mırle; Mşalena cali sbuthathe ume qariwo u gıdmawdcinala ba esore dkıtlan camu Huyodo d’Urifi udu medeano lıkmitaqbıl-dilonoyith du Asayiş dmosık mu cameydan-b’hawxa sbutho dkıtle zedqo dımdafci ruhe.

Bıthır mi maqırhonutho dfrısle u qoyumo catiqo Josef Sliwa, hawi droşe cali sbuthathe dkıtyo dişutho di morutho du cameydan dıkhoye ba qıryawothani du cameydan d’Sarsing d’Nuhadra bu garbyo du Cıraq.