U parlamento d’Urifi m’ayadle u taşroro şatonoyo du komisyon bhaq dı Turkiya di şato d’2024, unirle di hadomutho d’Anqara lu Huyodo d’Urifi lıffayişo mede kyonoyo realistic

BRUKSEL – U taşroro şatonoyo du komisyon d’Urifi bhaq dı Turkiya di şato da 2023 u 2024, kım’akıd da bazare di hadomutho dı Turkiya lu Huyodo d’Urifi heş magıldene, ubebzabno mawdacle di hadomutho d’Anqara lu Huyodo lıffayişo mede kyonoyo realistic bu taro da şuşote folitiqoye udu huquq dkito adyawma b’Turkiya. 

Mbayn da sebwotho dıgriş u zuhoro aclaye bu taşrorano, kito sturyo qaşyo la hçome folhoye dıksamlın u gayso dı Turkiya calu garbiyo u madınho d’Suriya. Bi sbuthathe, u parlamento d’Urifi makadle da hçomani kowın celtho lu hırhozo di şalyutho qlimoyto, ukdayşi u qonuno emwothoyo. Bebzabno, u taşroro makadle du dewam da hçome Turkoye cala fenyotho di mdabronutho yothoyto kmacıq a’fulhone dıkmisomi, bnişo dmıbne tefso demoqratoyo bi fnitho, ukmazcıf a’gade du şuroro du şlomo aminoyo. 

A’qoyume Urifoye bu taşroraththe mawdaclın ste di siyase folhoyto dkımmaşyola Turkiya, kımmathlo tehdid baroyo la timoyotho demoqratoye, ula fulhone mdinoye dıkmisomi bnişo dmıbne mdabronutho gawoyto dkımmathlo b’şıkıl kino a’came di fnitho. 

Camgabıdathe, u taşroro kali cali sbutho Kurdoyto b’Turkiya, u mşalatle bahro cali qroyto makthabzabnoyto dsımle Cabdalla Öçalan laşan du şlomo udu kenşo demoqratoyto. U parlamento d’Urifi mahwele dıktocın ğamo rabo cal di şultonutho dı Turkiya macmasla caynotha mu insiyativano du şlomo, u mawdacle d’Anqara mnaqela mdarbıd du şlomo, dmaqşiyo i mwatyutho di mşaynutho, udmaciqo calu kenşo Kurdoyo dilonoyith bıthır mdıshif u maşıqlo da bazare. 

M’gabo hreno, u taşroro Urifoyo sımle sturyo qaşyo i aykanoyutho di hirutho gawonoyto b’Turkiya, u grışle u zuhoro calu dewam di ciqutho dıkmisomo cala gelyunore, cala akdimikoye ucala farsufe dkımdafci a’zedqe noşoye. Bebzabno, u taşroro grışle u zuhoro cali mhilutho di şaryutho du bethdino b’Turkiya dıkmitıstacmıl zıd ale laşan du sefoyo di saqıbloyutho folitiqoyto.