U qentrun fatıryarxoyo di cito Suryoyto Marunoyto dı Bkırki sımle baytoyutho lu knuşyo da fatıryarxe u da rişone da citotho d’Lebnon

U qentrun fatıryarxoyo di cito Suryoyto Marunoyto dı Bkırki, sımle baytoyutho lu knuşyo da fatıryarxe u da rişone da citotho d’Lebnon.

U knuşyano mtayıb xıd hıdriye di lqoyto dgıdhowelın a rişone da citotho d’Lebnon cami qadişutho du papa du Vatikan Mor Fransis Qadmoyo, bnişo dmıdroşo i aykanoyutho gawonoyto du athro d’Lebnon dmati l’qum du shofo.

Cali zminutho dımşadrole i qadişutho du fatıryarxo da Suryoye Marunoye Mor Bşara Bıtrıs Alraci, athmıl safrayto mtayıb knuşyo rwiho bu qentrun fatıryarxoyo dı Bkırki dmıştawtaflele fatıryarxo Alraci, u fatıryarxo da Suryoye Qatholiqoye Mor İğnatiyos Yusıf Tlithoyo Yunan, u fatıryarxo da Suryoye Malkoye Ortodoksoye Mor Yuhanna da casro Alyazaji, u fatıryarxo da Suryoye Malkoye Qatholiqoye Mor Yusıf Alcabsi wu fatıryarxo du bayto d’Kilikya da n’Armınoye Ortodoksoye Mor Aram Qadmoyo Keşişyan wa hsayo di cito Kaldoyto u Latinoyto uda n’Armınoye Qatholiqoye di marcitho d’Lebnon.

Bu knuşyano, a’rişone citonoye drışlın bırwihutho i aykanoyutho gawonoyto d’Lebnon xıd hıdriye li lqoyto dgıdhowelın ha bu yarho dı Tamız dıbqamuthayna cami qadişutho du papa Mor Fransis Qadmoyo bu athro du Vatikan, bnişo dımşawri hdode bi sbutho di xarita du şroyo du kriz d’Lebnon, udımqadmi slutho mşawtafto camıhdode laşan u furqono du athrano.

Fatıryarxo Yunan bu mamlo dsımle grışle u zuhoro calu qento di aykanoyutho d’Lebnon, bu zabno dkımdacın a’rişone folitiqoye du athro kulle dkıtne masre camu nomuso esonoyo d’Lebnon. Fatıryarxo Yunan grışle ste cali qroyto dsımle u papa la rişone da citotho d’Lebnon, u mawdacle du medano kmagle cali yasifutho dkıtle i qadişuthayde laf Lebnon ucalu ğamo dıktocın b’lebe laşan du athrano. Camgabıdathe, fatıryarxo Yunan sımle qroyto la rişone folitiqoye Mşihoye d’Lebnon dıtorın a’yuthronaththe a’farsufoye, udmıftakri b’Lebnon xıd athro u xıd ithutho bu maşıqlo casqano ducdo.

Bu knuşyano, a’rişone citonoye makadlın dıklozım b’surhobo dmişatso i şultonutho d’Lebnon, udmimıd u diyalog wi ruho di mşalutho mşawtafto xıd asas du nfoqo mu krizano dıkşofıc ebe u athro.

U bu huthomo du knuşyaththe, a’rişone citonoye mqadamlın slutho mşawtafto laşan dmitarku u şlomo b’Lebnon uba n’athrawotho du madınho mescoyo.