U qlimo d’Kurdistan mahıtle tedbire di Corona

U qlimo d’Kurdistan du Iraq, sxırle a citotho, a masığde wa macıbde mi celtho d’zayıd ğalabe u virus di Corona.

U fusqonano dfayıt athmıl la haye, gıdmdawım casro yawme, ubu şıkılano u camaydan dıkhoye bu qlimo lıgmcayıd yawme d’Huşabo dıbqamuthayna u cedo di Qyamto dıkmcaydile a citotho lfuth u surgodo du macırbo.

İ sictho celayto dıknıfqo mqabıl du virus d’Corona du qlimo d’Kurdistan du Iraq, bu knuşyo dsımla yawme dı Tlotho dşaficina, fsıqla dsıxro a’citotho, a masığde a’macıbde da Ezidoye wa dukotho hrene di slutho, mi celtho dıktofe u virus d’Corona b’şıkıl rabo bayn da bnaynoşo.

İ sictho dıfsıqla ste dmısxori a’salone wa hudre da hfitwotho tawdithoye, ubebzabno mawdacla du fusqonayda athmıl yawme d’Hamşo dıknofıl ha bu yarho d’Nison mafıt la haye, u gdımdawım hul 10 bu yarhano.

Bebzabno, i sictho makadla d’aydarbo hani zıd tlotho şabe sxiri a’madraşyotho wa botaysawbo, hawxa ste lıgıdobo fsoso dmitayıb hage u hfitwotho tawdithoye u sımla qroyto la rişone tawdithoye dsaymi u mede dıknofıl aclaye, laşan dmınfıq moro lu hulmono da noşe.

Camgabıdathe, i sictho celayto dıknıfqo mqabıl du virus d’Corona du qlimo d’Kurdistan mnıcala l’10 yawme u mazlo mathyo bayn da hiğmınwotho du qlimo wa hiğmınwotho hrene dıknıfli bu taymno du Iraq u bu mescayde.

Bu şıklano, u camaydan dıkmawde lu mathhab Qatholiqoyo, laybe dımcayıd bu qlimo d’Kurdistan u cedo di Qyamto dıknofıl yawme d’Huşabo dıbqamuthayna, cal da citotho gıdhowın sxiri. U mede dıkgorış u zuhoro calu fusqonano, a’masığde gıdmıftohi la Maşılmone bıthır m’10 bu yarhano awkith meqım mdımşare u Ramazan.