U qoyumo Suryoyo Yusuf Aydin komer: bu maşıqlo dkito ucdo, kito gado l’şuhlofe leşan a Mşihoye du Madınho Mescoyo

STOCKHOLM – Yusuf Aydin dımnaqewo qoyumo ba 2022, hadır athmıl u knuşyo dsımwo bu parlamento du Swed. Aydin dkıtyo folitiqoro mu gabo da Mşihoye Demoqratoye mıştawtafle lu knuşyano dcali siyase di baroyutho du Swed leşan dmıdroşo i maqırhonutho di wazırto di baroyutho du Swed Maria Malmer Stenergard.

Bi dafo d’Aydin, mahkele cala sebwotho dkali aclaye bu mamlayde-xıd i sbutho di cali hirutho di tawditho wa rdufye dkull dkothe kızaydi u kıqoşın cala Mşihoye. Aydin mawdacle, lfuth u tukoso Qatholiqoyo d’Tarce Ftihe-Open Doors, hol 380 milyone d’Mşihoye b’britho kmitafiti ba rdufye mcal fothe di haymonuthathe.

Qoyumo Yusuf Aydin frışle duktho bu mamlayde cala Mşihoye du Madınho Mescoyo dkıtne b’qento du qşoco ban athrawotho dan abohothathe bıthır dore yarixe d’qrobo ulo mşaynutho. Ucdo bu maşıqlano, bıthır mıd madcafle u İran wa noqufayde b’Lebnon u Suriya wu nfolo du rejim catiqo d’Alasad, kito gado l’şuhlofe bu qlimano.

Aydin grışle u zuhoro calu mınyono du camaydan d’naqıs bu Cıraq ubı Suriya wu husrono dhiw li yortuthayde i marduthoyto u makthabzabnoyto. U camaydan dkıtyo şerşoyo bu qlimano, klozım’ste dhowe mawdyonutho kamılto ebe. Calathe kito sniqutho lu Huyodo d’Urifi ulu Swed dımdaxli bi sbutho d’Suriya leşan u terkiwo d’mdabronutho demoqratoyto dıkhobış bıgawa a came du athro kulle u dhowla nomuso dıkm’athıl a Mşihoye wa came hrene dkulle.