U rişızgado d’Amerika bu Iraq hawile ytawto cam Barham Salıh

U rişızgado d’Amerika bu Iraq Mathyo Toler bi ytawto dhawile camu rişqutno du Iraq Barham Saleh, maglele cala nışmone da grube mzayne dıksaymi hjome cali rişızgadutho Amerikoyto bı Boğdod u cala maşıryotho folhoye d’Amerika bu Iraq.

 Megabo hreno, Saleh bu mamlo dsımle makadle lu rişızgado Amerikoyo, du Iraq b’fusqono kamiloyo dımcaqıb agrube mzayne hayobe.

 U froshezwo d’Alcarabiya Alhadath maglele cala sebwotho dıdrişi bi ytawto dhawile u rişızgado d’Amerika bı Boğdod Mathyo Toler camu rişqutno du Iraq Barham Saleh bı Boğdod.

Bi ytawtathe, Saleh mıdle mawdconutho cali mşaynutho du grub diplomasi d’Amerika bu Iraq, u makadle di şultonutho d’Boğdod b’fusqono kamiloyo dımcaqbo agrube mzayne dıksaymi hjome b’soruhe di Katyuşa cali fnitho Yarıqto d’Boğdod u cala maşıryotho dıksaymi baytoyutho la haylawotho Amerikoye.

Mxasra hreto, u rişızgado Amerikoyo mahwele ilothnihutho dkıtla Waşington cali mşaynutho da folhayda bu Iraq, u mawdacleste du nqolo di rişızgadutho Amerikoyto l’Arbil klithoyo hul dmimıd fusqono mu rişono Donald Trump.

Bebzabno, u rişızgado Toler mqadamle l’Saleh mawdconutho ulsoyto cala nışmone da grube mzayne dıksaymi hjome di Katyuşa cali rişızgadutho Amerikoyto bı Boğdod u cala maşıryotho da haylawotho Amerikoye bu Iraq. Toler makadleste da grubani bu zayno dkıtlın kımhadıdi u maşıqlo demoqratoyo bu Iraq, ukmaciqi afulhone du kenşo emwothoyo bu haqlo di mcadronutho du Iraq.

Lfuth mabuce Iraqoye, agrube mzayne d’Alhaşd Alşacbi dıkmısnodi mu İran qayıthlın zuhore mi şultonutho d’Boğdod.

Cayni mabuceste, mawdaclın du waziro catiqo di baroyutho du Iraq Hoşyar Zibari kıtle mawdcınwotho cal tahrazyotho dı suikaste dıkmibıc dmitaybi bu yarhano mqabıl d’rişone da grube mzayne, u mawxaste agrube d’Alhaşd Alşacbi fayış kzayci dmıhjım cala rişonathe meqım ma qentrunathe.