İ şabake du camaydan-Geshro, dıkfulho leşan u teqwiyo di rehımtho udi ithutho du camo b’Turabdin, mabdele fulhono du teltimo d’istatıstik bişme ‘Turabdin och framtiden’

SWED – U istatıstik-u Enket dımtayable Geshro dışme; ‘Turabdin och framtiden’ kmisım ucdo belhude lu camaydan dıkhoye bu Swed u bıthır’ste, gıdmisım bğer athrawotho d’Urifi. Bu buhonano kmıgrış bu şuroyo u zuhoro cali rehımtho-intresse dzayido beyn du camaydan ba eşne haroyani l’Turabdin u dftıhla u darbo da socurwotho dıkmisomi kull şato lu qlimo.

Ba socurwothani dzaydi l’Turabdin, mahıtle’ste u camaydan kmoyutho rabtho d’zuze u ftıhle şuğlone, u bnele u mhathathle a bote wa qıryawothayde. Calathe u nişo d’Geshro bu istatıstikano, dımnahıl u dmaqrıh, u camaydan aydarbo kımfaşıq u şuşotano dkowe ucdo b’Turabdin.

Geshro komır; Kubcina tawtır dfuhmina, aydarbo kmihır b’Turabdin xıd nişo lu turizm, duktho dha qodır dcoyış eba u xıd duktho dmitahıt yuqro momunoyo eba. Camathe’ste, dmitaltımi a hzayotho dkito cala renye da gade uda qetre u casqotho dkibın dnufqi. İ şawtofutho du camo, ulsoyto’yo elayna u gıdmcadrolan, tawtır dfuhmina aydarbo u şuşotano kım’athır calu kenşo u mın kibe dmisım leşan dxulqina dactith msimono b’Turabdin.

U istatıstikano; ‘Turabdin och framtiden’ kmişakıl me 13 şwole u kibe dmiqafe; DOCS.GOOGLE.COM Turabdin och framtiden – Enkät ubebzabno bi dafo du facebook d’Suroyotv. Geshro kımawdıc’ste, en u camaydan dhowele şwole yaste dobıc dmıştawtıf lu buhonano, kibe dmasır esore acme.