U rişono d’CARNEG sımle sturyo i siyase dıksoyım Erdoğan mqabıl da mşihoye du athro

U mbahnono dcala sebwotho Emwothoye bu qentrun d’Karnegi Alexander Çurlax mawdacle du dactid da Mşihoye d’Turkiya bu qentoyo, mi celtho da rdufye dıkmisomi aclaye, u di siyase tuxmonoyto dıkmaşala u rişqutno Recep Tayyip Erdoğan.

 Bi mimartho dıfrısle Çurlax grışle u zuhoro cali şultonutho d’Erdoğan, dımşarela dsaymo rdufye cala Mşihoye bıthır mıd lo makşarla bi siyase dıkmaşyola bu athro d’Suriya ub’Libya.

 U mbahnono dcala sebwotho Emwothoye bu qentrun d’Karnegi Alexander Çurlax bi mimartho dıfrısle bi dafo Almanoyto d’DW, mırle; Bu zabno dıbritho kula knıfqo ucdo mqabıl du virus d’Covid-19 dıxlıqle kriz momunoyo u batilutho kenşoyto, i şultonutho d’Turkiya kımnasyo dmıstacmılo u kewano wi aykanoyutho ducdo, leşan dsaymo hboso zıttır cala qalilotho du athro.

U mbahnono mırle u dyoşo da Mşihoye d’Turkiya kzoyıd b’surhobo, u Erdoğan kımaşe tahrazto xlıto beyn di siyase Cuthmaniye wi tuxmonoyutho maşılmonitho. Wu ucdo Erdoğan kımnase dhojım cala qalilotho tawdithoye cal dılo makşarla i siyase dıkmaşela b’Suriya ub’Libya.

Cali siyase bceldboboyto d’Turkiya mqabıl da Mşihoye, u mbahnono huwle xıd mathlo u kboşo danarcotho uda mulkone da Suryoye wu shofo da citothathe. Ube bzabno grışle u zuhoro calu msoko barbıroyo du rişono di dayro d’Mor Yacqub Qarne dayroyo Aho Belijan u mırle; U msoko du dayroyo kımthabıt u dyoşo dkowe bhaq da zedqe da qalilwotho tawdithoye b’Turkiya.

U mbahnono da sebwotho Emwothoye bu qentrun d’Karnegi bu huthomo di mimarthayde komır; İ ctidutho du dayroyo Aho Belijan dıknotır u fusqono du bethdino, kımagılyo cali aykanoyutho dıhdo qalilutho dlatla dactid makdo bu athrayda u makthabzabnoyo.