U rişqutno d’Armenia hawile ytawto cam rabhaylawotho Gasparya

U rişqutno d’Armenia Armen Sarkissian hawile ytawto camu rişono du gayso rabhaylawotho Onik Gasparyan uğer mşale folhoye dtlıblın mu rişwazire Nikol Paşinyan dmıstacfe mi wolithayde.

 Bıthır mi ytawtathe dcama mşale Folhoye, u rişqutno laqi a mşale du Zawco Athronoyo du Texliso dkıtyo u gabo rabo di saqıbloyutho dıkmtayıb a tagliyotho mqabıl d’Paşinyan.

U rişono du gayso d’Armenia Onik Gasparyan sımwole yawme d’Hamşo qroyto lu rişwazire du athro Nikol Paşinyan, dmıstacfe mi wolithayde u krıhwole u amro dhuwole u rişwazire dmimıd Gasparyan mi wolithayde. Paşinyan, mşadarwole i egartho du myodo d’Gasparyan mi wolithayde lu rişqutno Sarkissian-dkıtle ucdo 3 yawme b’ido dımfanela.

Cali mwatyuthathe dhawyo b’Armenia’ste, athrawotho u rişone frişe dbritho tlıbwolın mu camo umi şultonutho dımyaqri a prensibe di demoqratoyutho u dımsafın u şwolano bu darbo du dialog. Calathe’ste u rişqutno Armen Sarkissian laqi athmıl u rişono du gayso Gasparyan uğer mşale folhoye, leşan dorşi i aykanoyutho harayto du athro.

Mawdconutho rwıhto lo fris cali netiçe di ytawtathe elo m’akıd dkle calu kriz dkito adyawma b’Armenia. Bıthır mi ytawtathe’ste, mıstaqbele u rişqutno mşale du du Zawco Athronoyo du Texliso dkıtyo u gabo rabo di saqıbloyutho dıkmtayıb a tagliyotho mqabıl d’Paşinyan. Ha ma mşale du Zawcano, mraşho’yo la guboye di rişwazirutho du athro.

Bu knuşyanoste u Zawco mqadamle i hzayto wa renyayde u tlıble mu rişqutno, dımsafe u şwolo dkito bu athro. U rişqutno, kmıntırste dloqe u rişono du parlamento uğer rişone da gabe folitiqoye du athro. Bu zabno da ytawyothani’ste, a mtagliyone saqıbloye wa mtagliyone sanode d’Paşinyan mdawamlın a protestowiyathe.