U rişqutno dı Turkiya Erdoğan tlıble şekolo dı nomuso esonoyo hatho

ANKARA – U rişqutno dı Turkiya Rejeb Tayeb Erdoğan bu zabno dkıtwe bi tayisto dacoro mu athro d’Hungaria, mfanele cala şuwole da gelyunore. Erdoğan bu funoyo dhule cala qroytotho dkito adyawma dmitayıb nomuso esonoyo l’Turkiya mırle “Turkiya kmişahılfo, ubritho ste kmişahılfo. Ahna b’zabno hatho na, u ahna krımşina laf zabno hatho”. 

Erdoğan dmawdacle dmıqqa casqoyo dmihayıd u kenşo Turkoyo b’nomuso esonoyo ma mdabrone da inqilabe ba na’40 ışne haroye dşaficina, hawxa ste mdawamle “Turkiya lıfayışla mkono dımhalqo dawsat laf qudmo laf dactid b’nomuso esonoyo dımtayıb ma mdabrone da inqilabe. U mede dkıtna sniqoye ele ucdo nomuso esonoyo mdinoyoyo, lo nomuso esonoyo ma mdabrone da inqilabe. Laşan di dawsathe ahna kfılhina xıd gabo d’AKP. Hulan teklif lhın ma hawronaydan dsaymi i wolithathe. Elo u şuwolo hanoyo: hal u gabo Qutnutho du Camo di CHP gıdmıştawtıf acmayna lu maşıqlano du tuyobo d’nomuso esonoyo mşawtfo u mdinoyo?. Hano yo u ulsoyo. Ahna kımmina: itoxu dhowina b’awyutho camıhdode, itoxu dımşatsina a’sicothaydan, ubu darbaththe qıdrina baroyo dımtaybina nomuso esonoyo mdinoyo, udımqadminale lu camaydan”. 

Bebzabno, Erdoğan mawdacele du qetraththe latyo masro cama n’arbıco mluwe qadmoye du nomuso esonoyo, u mırle “balhude gdımbaynina xarita du darbo. Kiban b’surhobo dımşatsina a’sicothaydan. Sımwolan u medano bu zabno di rişwaziruthaydan, ukiban dsayminale tekrar. U medano lıgıdgorış zabno yarixo. Bebzabno ahna kıbcina nomuso esonoyo lu athraydan, lo laşan d’ruhayna. Latli qetro ida dminaqeno awste dmiraşahno naqla hreto”.