U Rişwazire Yawnoyo mawdacle dı Turkiya dmatrıko a provakasyone dıksaymo

Bu mamlo dsımle u rişwazire du Yawnan Kyriakos Mitsotakis bu Mawtbo gawonoyo d’Emwotho Mhaydotho mawdacle, d’Turkiya klozım dmatrıko a provokasyonani dıksaymo bu madınho du yamo Mescoyo.

 Cali mwatyuthathe dkito bu yamo Mescoyo, u waziro di baroyutho d’Amerika makadle u snodathe lu Yawnan. Wu rişqutno d’Qufrus da Yawnoyeste mkararle dkıtne hadire la droşe du şlomo elo bu gzomano du zayno dıksaymo Turkiya.

U knuşyo du Mawtbo gawonoyo d’Emwotho Mhaydotho b’New York d’Amerika, kımdawım ba mamle da rişone u da mşale dathrawotho frişe dı britho. Athmılste athiwo u dawro du rişwazire du Yawnan u bu mamlayde Kyriakos Mitsotakis,  mzaharle Turkiya dıha ma alternative dkıtte mqabıl du provokasyonano dıksaymo bu yamo Mescoyo, dımqadmila lu bethdino Emwothoyoyo.

Mitsotakis dı grışle u zuhoro cala provokasyonani d’Ankara dıtfıklın u qlimano kule lı qento du qrobo mırle; A zawcani d’Turkiya hawın qento li mşaynutho du madınho du yamo Mescoyo u calathe, klozım baroyo dmatırko a qedomani. Ankara mfanela cali qroytaydan du dialog bu teqşiyo da provokasyone.

Bebzabno u waziro di baroyutho d’Amerika Mike Pompeo dkıtyo azolo lu Yawnan bi şabtho dıbqamuthayna, mawdacle u snodathe li şultonutho d’Athena bi sbutho di mwatyuthathe dkito cam Turkiya bu madınho du yamo Mescoyo. Bi socuruthathe, dılu Yawnan, Pompeo gıdşofıc l’Thessaloniki u l’Kreta u gıdhowele ytawto camu rişwazire.

Megabo hreno, u rişqutno di gozarto d’Qufrus da Yawnoye Nicos Anastasiadeste dsımle mamlo b’Emwotho Mhaydotho mırle; İ şultonuthaydi hadırtoyo la droşe du şlomo cam Turkiya elo lo bu gzomo du isticmal du zayno mqabıl didan. Leşan a droşani du şlomo dhowın mawthrone lu şuşoto, klozım dmitarkıw arcutho kyonoyto u hathe lıkmisomi ba haqarat uba gzome. Ma qedomani d’Turkiya, laybın a 2 falqe d’Qufrus dmihaydi.