U Shekh du Azhar d’Mısır krıhle u qedomo da Maşılmone dkımhaqri a’Mşihoye bu zabno du sawmo du ramadan

BRITHO – U rişono du şutoso du Azhar d’Mısır shekh Ahmad Altayyeb, bi maqırhonutho dhule lu tboco froso, mawdacle du tecjizo da barmothoye dlatne Maşılmone bu zabno du ramadan bi dawca du sawmo, qedomo dlatle asiruthoyo cami Maşılmonutho.

Altayıb bi maqırhonuthayde athmıl li sferyawmo du Qolo d’Alazhar mırle ”u tecjizo da Mşihoye bu muklaththe ubu ştoyaththe ba safrawotho du ramadan bi dacwa du sawmo, qedomo di saxluthoyo, lıkşowe ulatle ste esore lo m’qariwo ulo m’rahuqo cami Maşılmonutho”.

Altayıb bi maqırhonuthayde hawxa ste mşayele ”u Maşılmono dlaybe dhoze u hawrayde u Mşihoyo dkoxıl udıkşote bu zabno du fulhono awste laybe dıtocın udhoze barmothoye Mşihoye ba matcame bu zabno du sawmo du ramadan, inaqlayo u maşılmonano aydarbo kibe dıtocın awste dhoze a’nacimayde dlıkmitahwelın teklif du sawmo kmawkelın ukmaştelın bu zabno du sawmo du ramadan. Bu şıklano u Maşılmono kibe dımhaqır aw dmacjız a’nacimayde, yaste kibe dmonıc u muklo wu ştoyo maclaye?”.

I sferyawmo du Qolo d’Alazhar, mawdacla di maqırhonutho d’şex Ahmad Altayyeb gıdfırsola bu mnoyayda d’yawme d’Arbıco bi şabtho dıbqamuthayna, bu zabno dgıdımhane i qadişutho du fatıryarxo di cito Eğuftoyto wa Mşihoye d’Mısır bu cedo di Qyamto d’Mor Yeşuc Mşiho.