U Vatikan mawdacle i tahrazto di socurutho du Papa lu Iraq

U Vatikan mawdacle ruşmoyith i tahrazto di socurutho dgıdsoym i qadişutho du Papa Mor Fransis Qadmoyo lu athro du Iraq bu yarho d’Odor dıbqamuthayna.

 Lfuth i tahraztathe, u rişono di cito Qatholiqoyto bu zabno dgıdhowe b’Boğdod gıdsoyım socurwotho la citotho d’Sayıdıt Alnajat u d’Mor Yawsef, ubu zabno dgıdhowe bi daşto d’Ninwe gıdsoyım socurutho li cito d’Altahira Alkubra da Suryoye Qatholiqoye.

 U qentrun du tbocofroso du Vatikan, mawdacle ruşmoyith i tahrazto di socurutho du Papa Mor Fransis lu Iraq u dıkmıntır dımşaryo 5 uhul 8 bu yarho d’Odor. Lfuth i tahraztathe, gıdmisım zawho ruşmoyo du qubolo di qadişuthayde bu bethtawso d’Boğdod, ubıthır i qadişuthayde gıdloqe u rişwazire Mustafa Alkadhimi gıdızze bıthır lu qusro di rişqutnutho b’Boğdod, u gıdmisamle zawho ruşmoyo du qubolo mu rişqutno Barham Saleh.

U Papa bıthır ma lqoyotho dgıdhowele cam mşale di şultonutho udu kenşo mdinoyo u farsufe dıkfulhi bu haqlo diplomatiqoyo, gıdsoyım socurutho li cito d’Sayıdıt Alnajat da Suryoye Qatholiqoye dsımwo hçomo marhıbono acla ba 2010, u tamo gıdloqe i qadişuthayde hsayo, kohne, dayroye u malfone.

Yawme d’Şabtho, Mor Fransis gıdsoyım socurutho li hiğmonutho d’Alnajaf, u gıdloqe u rişono ruhonoyo da Maşılmone Şica du Iraq Cali Alsistani. U bıthır gıdşofıc li mdito makthabzabnoyto du camaydan d’Ur, uba şoce dcasriye gdımrayşın Qurobo Alohoyo bi cito d’Mor Yawsef da Kaldoye b’Boğdod.

Yawme d’Huşabo, u Papa gıdsoyım socurutho li mdito d’Arbil, u gıdloqe bu salon du bethtawso di mdito, a mşale tawdithoye u mdinoye du qlimo d’Kurdistan.Ubi socurutho dgısoyım bcaymi yawmano l’Mawsal, gıdmaqım i qadişutho teşmışto B’(H)oş Albayca cali ruho da dıbhe du qrobo.

Mor Fransis gıdmdawım li cito d’Altahira Alkubra da Suryoye Qatholiqoye dkıtyo d’Bağdede bi daşto d’Ninwe, u gıdmaqım teşmışto bi mıştawtfonutho du camaydan. Ubu dcorayde l’Arbil yawme d’Huşabo ba şoce d’casriye, gıdmtayıb u Papa Qerowo bu wahdo di esfireğlo d’Franswa Hariri. Elo yawme d’Tre, u rişono di cito Qatholiqoyto gıdızze lu bethtawso d’Arbil ba şoce d’safrayto, u tamo gıdmisamle zawho ruşmoyo meqım mu dcorayde lu Vatikan.