U waziro di baroyutho d’Amerika Blinken komer Amerika gidmcadro u camo d’Suriya, lo u rejim

Bıthır mi ytawto dhawyo athmıl beyn du waziro di baroyutho d’Amerika udu bar’amnayde d’Austoria, huwle Blinken maqırhonutho lu tbocofroso u m’akadle, d’Amerika hadırto’yo dfulho cama bnay’amnayda leşan dımcadro u camo sniqoyo d’Suriya, elo latla niye dcawdo cami şultonutho d’Darımsuq.

Blinken mırle; Kıtlan b’Suriya şutose noşoye dıkmısnodi me Amerika ubu tarano gıdhowe methcadronutho d’acmaye bnişo dmiqadım mcadronutho lu camo dım’athır mi zalzale. İ mcadronuthathe kula gıdmıfroşo lu camo ulo rejim du athro. İ mcadronuthathe kmitahwıyo lo mucdo, elo heş mu zabno dımşarele u qrobo b’Suriya.

Cali zalzalathe’ste, u Papa du Vatikan Mor Fransis qadmoyo tlıble adyawma ma noqufe di citayde dımsalın lban alfayo d’dıbhe b’Suriya ubı Turkiya u sımle qroyto lu kenşo Emwothoyo dımdawım u snodayde wa fulhonayde leşan dmitaxlıs u camo. U Papa mırle; Kımsalenolın u kobacno domarnolın, dkıtno acmaye, cama yaqrothathe ucam kull ha dhzele haşo mu gunhano u qaşyo.

Elo camu haşo rabano dxlıqla i zalzale qwitho b’Turkiya u b’Suriya, naqlat’ste kowe dumore. Beyn da shifotho da bote uda bınyone, maxlıs b’Jındıres d’Suriya zcurto dheş hatho mawlıdo. İ zcurtathe dheş kıtwa masırto bi sırre, mawlıdo bu zabno di emo udi iqartho kula kmıqtoli bi zalzalathe. İ zcurto d’baroyo nqilo la bethkrihe mawdıc di aykanoyuthayda tawto’yo u grışla u zuhoro du tbocofroso Emwothoyo kule.