U waziro du sutoro du rejim d’Suriya Cali Ayyub sımle socurutho lu athro d’Yurdnon

U waziro du sutoro du rejim d’Suriya Cali Ayyub, sımle socurutho lu athro d’Yurdnon, ulaqi u rişono du gayso di mamlaxtho rabhaylawotho Yusıf Alhıneti.

Bi ytawtathe, drişo ilothnihutho dkıtla i mamlaxtho d’Yurdnon mi şkihutho folhoyto du İran dkul dkothe krowıh u haylayde bu taymno d’Suriya awkith qariwo ma thume d’Yurdnon.

U waziro du sutoro du rejim d’Suriya Cali Ayyub, mabdele athmıl socurutho li mditho d’Camman, bnişo dmıdroşo i aykanoyutho di şalyutho da thume mşawtfe bayn d’Suriya u Yurdnon. İ socuruthathe i qadmoytoyo dıkmisomo mı mşalo Suri b’darğo celoyo lu athro d’Yurdnon mu zabno dımşarewole u qrobo gawoyo d’Suriya bi şato da 2011 uhul ucdo.

Lfuth mşale rabe bu haqlo deblomasi du macırbo, i mamlaxtho d’Yurdnon latyo thnihoyto mu rwoho di şkihutho folhoyto du İran dıkmibarbızi a’grubayde ba dukotho mdarbıd da haylawotho du rejim, dilonoyith ba fenyotho du taymno d’Suriya dkıtne qariwe ma thume d’Yurdnon. Bebzabno, Yurdnon latyo thnihoyo ma gabo d’Hizballa d’Lebnon dmaqwele u haylayde bi fnitho d’Alqunaytira dıknıflo cala thume dı Darca mi xasra du macırbo.

Bi maqırhonutho dhulın hın mabuce deblomasi lu froshezwo d’Alcarabiya Alhadath, maglelın dıdrişıste ba ytawyotho folhoye bayn d’Suriya u Yurdnon, i sbutho du tehzimo da gelone mtanwone d’zayido b’şıkıl rabo, wa mşale d’Yurdnon kmawdıci du gabo d’Hizballa yo bıthır di sbuthathe.

Mxasra hreto, u gayso d’Yurdnon mawdacle du rşonayde rabhaylawotho Yusıf Alhıneti laqi b’Camman u waziro du sutoro d’Suriya Cali Ayyub, u drışlın i aykanoyutho harayto dı Darca, u nfoqo mqabıl di marıhbonutho wu tehzimo da gelone mtanwone bi fnitho.

Mosko bu zabno dımşarewola dımcadro u rejim laşan dmahıt ido cala fenyotho du taymno, huwola garanti l’Yurdnon, l’İsroyel ul’Amerika dlıgıdobo fsoso la grube mzayne İranoye dmarwıhi u haylaththe bi fnitho du taymno d’Suriya dkıtyo qaruto ma thume dcam Yurdnon uma turone du Golan d’İsroyel.